Ilulissat
Ilulissat nalliuttorsiornissaminut piareersarpoq
Ilulissat tunngavilerneqarnerminit ukiunik 275-inngortorsiorpoq. Tamanna nalliussineqassaaq juulimi sapaatip akunnerata naanerani kingullermi sapaatip akunnera tulliuttoq tamaat ilanngullugu, pisussarpassuaqarporlu.
Qaasuitsup Kommuniata nalliuttorsiornissami pisoqartitsinissat saqqummiuteqqammerpai, ilaatigullu tassaapput oqalugiarnerit, erfalasup amuneqarnera, katinngaserluni ingerlaaqatigiinneq ullaakkorsioqatigiinnerlu.
Meeqqanut balonnginik tunioraasoqassaaq aammalu Hinnarik Maalialu kiisalu Julie Berthelsen aamma Peter Nørgaard tusarnaartitsissapput.
Katersortarfimmi illoqarfimmiut sanaluttartut kusanartuliaminnik tuniniaassapput Arnallu Peqatigiiffiat atisaliaminik tuniniaassalluni. Kulturip illorsuani Sermermiuni ilaatigut illoqarfinnit ikinngutigisanit saqqummersitsisoqassaaq kiisalu grill-erisoqassalluni, uaaeertoqassalluni, kalattoortoqassalluni aammalu inuit pinnguaataat sammineqassallutik. Ilulissat Timersortarfianni illoqarfimmi erinarsoqatigiit tusarnaartitsissapput. Sisamanngornermilu nerersuartoqassaaq qitinnermik naggaserlugu.
Oqaluffimmi naalagiartoqassaaq immikkullu iliveqarfinni nigaliliisoqassaaq erinarsoqatigiinnik erinarsortoqarluni. Zions Kirkemi operamik erinarsortartoq Josef Josefsen allallu tusarnaartitsissapput, imaanilu ajunaarsimasut eqqaassutissaannut nigaliliisoqassalluni. Oqaluffiup saavani ilaatigut illoqarfimmiut ikiortigalugit illoqarfiup qanga najugaqarfittut isikkoqarsimanera takutinneqassaaq.
Ilulissat Katersugaasivianni illoqarfiup oqaluttuassartaanik saqqummersitsisoqassaaq aliikkusersuissappullu Ilulissat Kalattuuat (Klara Kristensen & Hr. Fussing).
Marlunngornermi aggustip 2-anni illoqarfimmi timersoqatigiiffiit arsaallutik unammissapput.
Illoqarfiup inuuiani, aggustip 3-anni, illoqarfimmi innuttaasunik nersornaasiisoqassaaq. Aqaguanilu illoqarfimmut tunissut borgmester Ole Dorphip uliissavaa.
Naalakkersuisut siulittaasuat Kim Kielsen Ilulissat nalliuttorsiornerani tikeraassavaa, Ilulissat illoqarfittut ikinngutaani borgmesterit peqatigalugit.
Nalliuttorsiornerit naggataarneqassapput tallimangornermi aggustip 5-anni arfininngornermilu 6-anni, Ilulissat Timersortarfiani nalliuttorsioqatigiinnermi, tassani ilaatigut nipilersortuussallutik Disco Bay Blues, Maria Mathiassen, HEJ, AQQUTIT, Thornestones, Nukaaraq & Gert Kristensen, SIKO aammalu Kaalinnguaq.