Ilulissat Kangerluani sikumi aalisartut oqisaavigineqartut

Qimusserlutik Ilulissat Kangerluani sikumi ukiuunerani aalisartartut maanna sivisunerusumik aamma pisaqarnerullutik kangerlummi aalisarsinnaanngorput.

Tamanna pivoq Qaasuitsup Kommuniata akuersissuteqarfigimmagu qimusserlutik sikumi aalisartartut pisaat Ilulissat Kangerluaniit iluliarmiunit qamuteralinnik angallasserusuttunit nunakkut Ilulissani Royal Greenlandip tunisassiorfianut assartuissussisinnaanerat.

Taama Royal Greenland nittartakkamini allappoq.

Kisianni akuersissummi tunniunneqartumi piumasarineqarsimavoq qamuteralaat taamaallat aqqut aalajangersimasoq ataaseq ingerlaarfigalugu - nunakkuinnarlu ingerlaarlutik, Unescop nunarsuarmioqatigiinnut Ilulissat Kangerluat kingornussassanngortissimavaat ingerlaarfigeqqusaanngimmat, assartuisinnaasut.

- Akuersissut, taamatullu periarfissaq nutaaq qimusserlutik sikumi aalisartut ukiuunerani sivisunerusumik aalisarsinnaanerannik annertunerusumillu pisaqarsinnaanerannik periarfissiivoq, Ilulissani aalisartut piniartullu peqatigiiffiani, SQAPK-mi, siulittaasoq Hans Lars Siegstad Royal Greenlandimut taama oqarpoq.

Qalerallit tonsit sapaammi assartorneqartut
Qimussimik aalisartut sikumi, Ilulissaniit 70 kilomteri tikillugu ungasitsigisumi, aalisartarput, nalinginnaasumillu pisatik qimussimik illoqarfiup tungaanut nammineq assartortarsimallugit.

Maannali taamaattariaqarunnaarpoq.

Aalisartummi maanna pisatik sikumiit nunamut 5 imaluuniit 20 kilometerisut isorartutigisoq aqqutigalugu taamaallat assartorsinnaalerpaat, tassanngaanniit 50 kilometeri isortartutigisoq aqqutigalugu nunakkut Royal Greenlandip tunisassiorfianut Ilulissanut assartorneqarsinnaalermata.

- Aalisartut peqatigiiffimmut sorlermulluunniit ilaasortanut periarfissaq atorneqarsinnaavoq. Neriuutigaarput aaqqissuussineq aalisartut amerlanerusut qimusserlutik aalisartaqqilernissaannik nassataqassasoq, Hans Lars Siegstad Royal Greenlandimut oqarpoq.