qinersineq

Ilulissat: Amerlanerit taasipput

Inatsisartunut qinersinermi Ilulissani tallimanngornermi nalunaaqutaq ullup qeqqanut qinersisut siornamut sanilliullugit 41-nik amerlanerupput. - Immaqa atornerluisimaneq pissutaavoq, qinersivimmi aqutsisoq isumaqarpoq

Ilulissani qinersiviup aqutsisua Salomine Villadsen

Anoreqarani taamaallaat -12,8 issittoq qinersinernut sunulluunniit ullutsialaavoq qinersiartorfissaq.

Ilulissani qinersivimmut, Kulturhuset Sermermiuni, illoqarfiup qeqqani inissisimasumut, inuit neriuuteqarluartut ornigullattaaginnaavipput.

Immaqalu silaginnera pissutigerpiarlugu Ilulissani siornamut sanilliullugu ullup qeqqanut qinersiartortut 41-nik amerlanerupput.

Taama qinersivimmi aqutsisoq Salomine Villadsen isumaqarpoq.

- Anoreqanngilaq silagillunilu. Immaqa taamaammat qinersiartortut amerlanerupput siornamut sanilliullugu. Kisianni immaqa aamma atornerluisimaneq pissutigalugu inuit qinerserusunnerusunnerulersimapput, Salomine Villadsen oqarpoq.

Siornami Inatsisartunut qinersinermi ullup qeqqanut qinersiartorsimasut katillugit 648-iusimapput, ukioq manna qinersisinnaasut 689 ullup qeqqanut qinersiartoreersimasut.

Inatsisartunut qinersinermi Ilulissani qinersisinnaasut katillugit 3249-iupput.

Powered by Labrador CMS