Ilulissani suliffeqarfiit nunani avannarlerneersut naapittut

Siullermeerluni nunani avannarlerni attaveqaatit FN-ip Nunatsinni Global Compactimut ataatsimiinnermik ingerlatsisoqassaaq.

Nunani avannarlerni suliffeqarfiit ataatsimiinnissaannut, peqatigiiffiit aamma pisortat suleqatigalugit suliassanik kivitsigunik angusaqarnerusinnaanerat tunngaviusumik eqqarsaataavoq.

Suleqatigiinneq ukkatarineqartoq
Suliniaqatigiiffinnit NGO-nillu 70-it missaannik amerlassuseqartut Ilulissani peqataapput. Ataatsimiinneq marlunngornermi pingasunngornermilu pissaaq.

Ataatsimiinnermi qulequtaq pingaarneq tassaavoq 'Nungusaannginnissamut suleqatigiinneq', oqalugiartullu kalaallit ilagissavaat, soorlu Maliina Abelsen aamma professor Minik Rosing Københavns Universitetimeersoq aamma Ilisimatusarfimmi siulersuisuniittoq.

Suliffeqarferujussuit aamma NGO-t
Nunanit allanit oqalugiartussat ilaat tassaapput tuluk professori Laura J. Spence, Gunnar Bengtsson Volvo Groupimeersoq, biililiorfissuup Verdensnaturfondenimik suleqateqarneranik oqaluttuartussaq, nungusaataanngitsumik atuinermut pisortaq, Simon Boas Hoffmeyer Carlsbergimeersoq.

Nakorsaasiorfissuarmit Novo Nordiskimit pisortap tulliata Susanne Stormerip ilaatigut nungusaataanngitsumik atuineq pillugu nalunaarusiaq eqqartussavaa.

Nunanit avannarlernit workshopit
Oqalugiartussat sammisaqartitsisussallu allat ilaatigut Verdensnaturfondenimit, Copenhagen Business Schoolimit (CBS), Pandoramit, Danfossimit aamma Kongsberg Groupimit pisuussapput.

Oqalugiarnerit minnerunngitsumillu sammisaqartitsinerit aqqutigalugit Kalaallit Nunaannit, Danmarkimit, Islandimit, Norgemit, Sverigemit aamma Finlandimit peqataasut ingerlatseqatigiiffinni inuiaqatigiinnilu nungusaataanngitsumik atuinermi unammilligassat, sunniuteqarsinnaasunut assersuutit pisartullu oqallisigissavaat.

Ilulissat pillugu allaaserisat tamaasa uani atuakkit