ikuallattoq
Ilulissani ikuallattup qaminnissaa sulissutigineqarpoq
Pisiniarfik GH Data ikuallappoq, ikuallanneralu siaruariartorunnaartoq politiinit nalunaarutigineqarpoq. Najugaqarfiit aalajangersimasut igalaavi matuilu matoqqatinneqarallarnissaat politiinit kajumissaarutigineqarpoq
Ilulissani Konrad Chemnitzip Aqqutaani pisiniarfik GH Data ikuallappoq annertuumik pujuliuleraluarluni. Ikuallanneq siaruarunnaartoq politiinit nalunaarutigineqarpoq, ikuallattullu qaminneqarnissaa maannakkut sulissutigineqarpoq.
Ilulissani politiit pisortaat Gedion Quist Sermitsiaq.AG-mut nalunaaquttap 08.30-p missaani ilisimatitsivoq.
Ikuallattup eqqaani najugaqartut angerlarsimaannarnissaat politiinit kaammattuutigineqarpoq ullaap ingerlanerani.
Mathias Storchip Aqqutaani aamma Illumiuni najugaqartut igalaavisa matoqqatiinnarnissaat matullu matoqqaannarnissaat politiinit suli kaammattuutigineqarpoq.
- Taakkunani najugaqartut igalaavisa matuisalu matoqqaannarnissaat kaammattuutigaarput, Gedion Quist oqarpoq.
GH Data-mi ikuallattoqarnera nalunaaqutaq 05.05 nalunaarutigineqarpoq. Qatserisartut aqutsisuat ikuallattumut 05.11 orniguppoq, ikuallattullu qaminniarneqalerluni nalunaaqutaq 05.14, Ilulissani politiit nalunaarput.