ilinniartitaaneq
Ilulissani atuarfissaq nutaaq immikkut akuersissuteqartariaqartoq
Atuarfiup nutaap sanaartorfissaq atuuttoq qaangissavaa. Taamaattumik immikkut akuersissut tusarniaavigineqarpoq
Ilulissani atuarfik nutaaq atuarfitoqqap, Atuarfik Mathias Storchip, inaani sananeqassaaq. Atuarfimmut nutaamut pilersaarut maanna tusarniaavigineqarpoq. Atuarfissap ilusilersorneqarnera pissutigalugu sanaffissaani kommunimut pilersaarummi atuuttumi aalajangersakkanit arlalinnit immikkut akuersissuteqarnissaq pisariaqarpoq. Sanaartornermut Avatangiisinullu Ataatsimiititaliap innuttaasup tusarusuppai sanaartugassamut kommunimut pilersaarummit immikkut akuersissuteqarnissaq qanoq isumaqarfigineraat.
Makkunatigut immikkut akuersissuteqartitsiniartoqarpoq:
Sanaartorfissaq. Atuarfiliassap ilaatigut sanaartorfissatut atuuttut annikinnerusumik qaangertassavai.
Atuarfiup isikkivissaa. Atuarfik nutaaq kangimut-kimmut sammisuunngilaq, isikkiveqanngitsutulli X-itut sananeqassalluni.
Atuarfiup saqqai ilusilersorneqarneralu sanaartukkanut pioreersunut naleqqussassaaq. Suliniummi nutaami atuarfitoqaq isativinniarneqarpoq, taamaattumillu nutaarluinnarmik sanasoqassaaq, atuarfik pioreersoq nutarternagu.
Atuarfiup ilai qaqortumik qalipaateqassasut. Sanaartugassami nutaami matut igalaallu aluramme-qarput.
Qaliata sivinganera. Suliniummi illup qalia manissuutinniarneqarpoq, imaluunniit 10 gradimik sivingatillugu.
Isertarfiit, aqqusineeqqat, illoqannginnersat pinnguartarfiillu inissiffissaat. Inissinneri naleqqussassapput suliniummut nutaamut ataqatigiissillugit.
Biilinik inissiisarfiit amerlassusaat. Biilinut inissiisarfeqassaaq, amerlassusaalli suliniup ilusilersorneqarnera malissavaat. Aamma usingiaaveqarlunilu usilersortarfeqassaaq, inissiisarfiit amerlassusissaannik sunniisinnaasumik.
Sanaartornermut Avatangiisinullu Ataatsimiititaliaq 2014-imi aggustip 29-anni ataatsimiinnermini aalajangerpoq immikkut akuersissuteqarnissamik qinnuteqaat tamanut ammasumik ulluni 14-ini tusarniaavigineqassasoq.
Tusarniaaneq ingerlassaaq septembarip 10-anniit 26-iannut. Tassa imaappoq akerliliinerit oqaaseqaatillu kommunimit tiguneqareersimassapput kingusinnerpaamik septembarip 26-anni.