Ilulissani Arsarnersiorfissamut alloriarneq siulleq

Arsarnerit alutornartut Ilulissani illorsuassami misissorneqarlutillu paasissutissiissutigineqassapput.

Ilulissani Arsarnersiorfissap piviusunngortinneqarnissaanut siullermik alloriartoqarpoq. Avannaata Kommunia aamma Danmarks Tekniske Universitet (DTU) marlunngornermi suleqatigiinnissamut isumaqatigiissummik atsioqatigiipput.

Arsarnersiorfik DTU-mi ilisimatusartunut allanut ilisimatusarfiussaaq. Kisianni tamatuma saniatigut tikeraartarfittut takusassarsiortarfittut atorsinnaassaaq, tassani takusassarsiortut arsarnerit pillugit paasisaqarsinnaallutillu takusaqarsinnaassapput.

Illu 300 kvadratmeterit missaanni angissuseqassaaq. Taanna Ilulissat Kangiata anigguata tungaanut isikkiveqartillugu Inussussuup Tasiata eqqaani inissinneqassaaq.

Avannaata Kommuniani kommunalbestyrelsip sulinerup ingerlaqqinneqarnissaa taperserniarlugu aalajangerput, suliniutip aallarnisarneqarneranut 1 million koruuninik aningaasaliillutik. Aningaasaliissutit aamma DTU-p isumagisassaatut aningaasaateqarfinnit pissarsiornissamut atorneqassapput.

Manna tikillugu kommunimut DTU-mullu assut nuannaarutaasumik suliniummut Danmarkimi aningaasaateqarfiit soqutiginninnerminnik takussutissiisimapput.

Sumi tulluarnerpaasussami ingerlatsivik sananeqarsinnaalersillugu illoqarfiup ilaanut pilersaarutissatut siunnersuut kommunip maannakkut suliarivaa. Arsarnersiorfik illoqarfiup avataaniissaaq, sulili illoqarfiup ilaata iluaniissalluni, illu innaallagissatut kiassarnertullu ittunik pilersorneqartariaqarmat.

Powered by Labrador CMS