Ilulissani aqqusinikkut angallanneq nakkutiginerulerlugu

Piffissami aggersumi Iluissani politiit aqqusinikkut angallanermik nakkutilliineq pingaarnerutinniarpaat.
Tamatumunnga pissutaavoq politiit innuttaasullu misigisalersimammassuk aqqusinikkut angallattut arlallit akisussaassuseqanngitsumik biilertartut imaluunniit ralaatigut aqqusinikkut angallannermi inatsit malinneq ajoraat, taamaasillutillu aqqusinikkut angallannermi imminnut allanillu ulorianartorsiortitsillutik.
– Aqqusinikkut angallattunik nakkutilliinerulernermi sammineqassaaq kikkut tamarmik - pingaartumillu meeqqat - biilimi eqqortumik qitequsertarnersut biilertorlu mobiltelefonimik tigumiartakkamik atuinnginnersoq. Aqqusinikkut angallannermi inatsimmi aalajangersakkanik allanik unioqqutitsisut soorunami aamma iliuuseqarfigineqartassapput, Ilulissani politiini iliuuseqarnermut pisortaq Sebastian Bech oqaluttuarpoq.
Taassuma ilanngullugu oqaatigaa aqqusinikkut angallannermi meeqqanik samminninnermi aamma taxat, meeqqanik ilaasullit, misissuiffigineqartassasut.

Saaffiginnittut arlallit
Politiit piffissami aggersumi aqqusinermi angallannermik suliniuteqarnerannu pissutaapput politiit namminneq misigisarsimasaat, aammattaarli innuttaasut arlallit politiinut saaffiginnittarsimammata aqqusinermi akisussaassuseqanngitsumik angallannernik, tamannalu illoqarfimmi piffissami kingullermi annertusiartorsimagunarpoq.
– Aqqusinikkut angallannermik nakkutilliinerulerneq pissaaq illoqarfimmiunut tamanut aqqusinikkut angallannerup isumannaatsuunerata qaffafssarnissaa, meeqqanik inersimasunillu erloqinartumik ajutoornerit pinngitsoortinniarlugit, Sebastian Bech nassuiaavoq.
Ilulissani politiit neriuutigaat aqqusinikkut angallannermik nakkutilliinerup takutikkumaaraa Ilulissani innuttaasut aqqusinikkut angallannermi inatsit nalinginnaasumik malittaraat, ilanngullugulu neriuutigalugu politiit killilimmik angallattunut akiligassiiumaartut, mianersoqqussuteqarumaartut il.il.