Sikuiuitsoq Kujalleq

Iluliarujussuaq isarukitsut 150.000-t inuunerannik akeqarsimavoq

Sikuiuitsumi Kujallermi Iluliarujussuup, Fyn-itut angitigingajattup, isarukitsut imaannarsuarmut appakaannissaannut mattussimavai

Ukiualunnguit matuma siornatigut Commonwealth Bay-imi Cape Denisonimi isarukitsut 160.000-t missaannik amerlassuseqarsimapput. Australiami New South Walesimi universitetimi ilisimatuut kangerliumanermi isarukitsut amerlassusaat maanna misissorsimavaat, paasisaallu nakeriallannaqaat

Sikuiuitsumi Kujallermi Cape Denisonimi isarukitsorpassuaqarfik ajunaarnersuarmik nalaanneqarpoq, isarukitsoqarfimmi tassani isarukitsut nungutaanissaanik kinguneqarsinnaasumik.

Ukiualunnguit matuma siornatigut Commonwealth Bay-imi Cape Denisonimi isarukitsut 160.000-t missaanniissimapput. Maanna Australiami New South Walesimi universitetip kangerliumanermi tassani isarukitsut amerlassusaat misissorsimavaa, paasisaallu nakeriallannarsimaqaaq.

Aviisi The Guardian allappoq tassani isarukitsut maanna 10.000-iinnanngorsimasut, universitetimilu Silap Pissusiata Allanngoriartorneranut Ilisimatusarnermut Centerimi ilisimatuut oqarput imaassinnaasoq tassani isarukitsut ukiut 20-t qaangiuppata nunguillutik nungussimassasut.

Isarukitsoqarfik taanna 2010-mi ajunaarnersuarmik nalaanneqarpoq. Taamanikkut isarukitsoqarfik tamanna allanngorpoq, iluliarujussuaq kangerliumanermik, isarukitsut najugaqarfiannik, mattussimmat, isarukitsut imaannarsuarmut nerisassarsiorlutik appakaasinnaajunnaartillugit.

Tuluit aviisiat naapertorlugu iluliarujussuaq 2900 kvadratmeterisut angissuseqarpoq - Fyn-imit mikinerulaarluni. Ilisimatuut iluliarujussuaq atsersimavaat B098.

2010-mi ulloq kinguneqapiluttussaq taanna aallarnerfigalugu isarukitsut nerisassarsioruminaatsitsilerput. Australiami ilisimatuut naapertorlugit isarukitsut imaannarsuarmut nerisassarsiorniarlutik maanna 60 kilometerit pisuttariaqarput.

– Iluliarujussuup B098-ip Commonwealth Bay-imik mattussineratigut kingornalu immap sikuata annertusineratigut Adéleie-mi isarukitsut Cape Denison-imi neriniartarfimminnukarsinnaaffiat talleriarujussuarsimavoq, atuagassiami Anarctic Science-mi allaaserisami ilisimatuut oqarput.

– Cape Denisonimi isarukitsut ukiut 20-t iluanni nungussinnaapput, iluliarsuaq B098 saavinngippat, imaluunniit tassani immap sikuata ilaa peerutinngippat.

The Guardian naapertorlugu iluluserujussuaq kangerliumanermut tassunga pinnginnermini ukiut 20-t missaanni Commonwealth Bay-imiissimavoq, tassanilu nikinnaveersimalluni isarukitsunut tusintilippassuarnut ajunaarutaasumik.

Powered by Labrador CMS