Amerikamiut ernumasut:
Iluliarsuarpassuit Nunatsinneersut umiartornermik ajornartorsiortitsisut
Iluliarsuit takkuteriasaarlutik umiarsuit angallannerannik ajornartorsiortitsipput
Iluliarpassuit 400-nit amerlanerusut sapaatip-akunnerani kingullermi Amerikamiut sinerissami alapernaarsuisuisuinit mianersoqqussutigineqarput.
Nalinginnaanngitsumik iluliarsuarpassuit Amerikap kangiata sineriaani ilaasunik umiaarsuarmik angallassineq sunnerpaa, The Huffington Post ilaatigut allappoq.
Iluliarsuit amerlassusaat sapaatip-akunnerata iluani 37-nit 450-t sinnerlugit amerlassuseqalersimapput.
- Sikunik alapernaarsuinermik ukiut qulit missaanni misilittagaqarpunga, piffissamilu tassani imaluunniit allanit tusakkannik taama ittumik tusagaqarnikuunangalu tusagasaqarnikuunngilanga, Gabrielle McGrath, ilulissanik alapernaarsuisut aqutsisuat aviisimut oqarpoq.
Anori aamma silap kissakkiartornera
Amerikami tusagassiorfiit arlallit naapertorlugit anorersuarnerani iluliarsuit Nunatsinneersut sumiiffimmi katersuussimapput.
- Iluliarsuit umiarsuit angalaffianut pisartut Kalaallit Nunaata sineriaanit sermiminngaanneertarput, sinerissami alapernaarsuisut tusagassiorfinnut oqarput, ilulissallu nalinginnaasumik ukioq ataaseq aamma pingasut akornanni sivisussusilimmik ingerlaartaraluartut.
Silap pissusiata allanngoriartornerani sumiiffimmi iluliarsuit amerliartornissaannik kinguneqassasoq ilisimatuut aarlerisaarutigaat, taakkulu misissuinermut Nature Communicationsimi saqqummersinneqartumut unnersuussipput. Tassani ilisimatuut aarlerisaarutigaat, Kalaallit Nunaata sineriaani aakkiartortoq saqiffini angoreersimagaa.