Ilulissat

Illussanik titartaasartut ukua isfjordscenter titartassavaat

Ilulissani isfjordscenterissaq maanna ilusilersorneqassaaq, tamannalu pissaaq illussanik titartaasartunik unammisitsinikkut

Ilulissani illumi nutaami takornariat kiffartuunneqatassapput

Illussanik titartaasartut Nunatsinneersut, Islandimeersut, Danmarkimeersut, Japanimeersut, Tysklandimeersut Norgemeersullu siunnersuusiussapput Ilulissani isfjordscenterissaq qanoq isikkoqssanersoq.

Suleqatigiiaat illussanik titartaariaatsikkut Ilulissani kangerluanullu eqqaanni naapittarfittaassap siammarsaasarfittaassallu isikkussaa takorloorniassavaat. Centereqarfiliorfiginiagaq UNESCO-p nunarsuarmiunut kingornussatut allattorsimaffianut ilanngunneqarnikuuvoq, centerilu sananeqassaaq Qaasuitsup Kommuniata, namminersorlutik oqartussat aningaasaateqarfiullu Realdaniap suleqatigiinnereisigut.

Illussanik titartaasartut aajuku

Suleqatigiit arfinillit centerissamut siunnersuusiortussat tassaapput, Arkis, Dorte Mandrup Arkitekter/Avannaa/Kriustine Jensen, Kengo Kuma and Associates, Rintala Eggertsson Architects, Snøhetta aamma Studio Other Spaces v. Olafur Eliasson. Oktobarimi illussanik titartaasartut tamarmik Ilulissanut tikeraassapput, suliassaminnut piareersaatigalugu sanaartorfissaq takusarlugu.

Illussanik titartaasartunik unammisitsinermi ajugaasoq pilersaarut malillugu 2016-imi juunimi tamanut saqqummiunneqassaaq.

Centerit amerlanerusut

– Isfjordscenteri visitorcenterissat arlallit siullersaraat, tamakkualu takornariaqarnermut periutsimi nutaami, Naalakkersuisut ukiaq manna saqqummiussassaanni, tunngaviussapput. Taamaattumillu aamma pissanganartorujussuuvoq ima suliamik siuartigisimasugut, suleqatigiit arlallit suliarilissallugu centerissaq qanorpiaq isikkoqassanersoq, inuussutissarsiornermut takornariaqarnermullu naalakkersuisoq Vittus Qujaukitsoq (S) tusagassiorfinnut nalunaarutikkut oqarpoq.

Realdaniap pisortaanerata Jesper Nygårdip qilanaaraa, illussanik titartaanermik unammisitsinermi ingerltsivippassuit pissanganartut siunnersuutaasa takunissaat.

Ikaartarfik gangbro pilersaarummut ilaavoq

Kangerlu Isfjorden ukiumut 17.000-t missaannik takornariarfigineqartarpoq. Tikittarfittaassaq siammarsaasarfittaassarlu naapittarfittut atussaaq illoqarfimmiunut aammalu silap pissusianik ilisimatuunut nunanit tamalaaneersunut, naalagaaffiit pisortaannut allanullu, akuttunngitsumik Ilulissaniittartunut.

Centeri illoqarfiup kangerluullu akornanni nunamiissaaq. Isfjordscenterip saniatigut nutaamik pisuinnaat aqqutaannik sanasoqassaaq, illoqarfimmit centerimut aqqutissamik.

Illu angisoorsuussanngilaq, sumiiffik tamanna centerillu pinngortitamut attuumanera ataqqiniarlugit. Tamanna peqatigalugu illumik pilersitsiniartoqarpoq, illup sananeqaataata tusaamasanillu saqqummersitsisarnerit Ilulissat takornariarfissatut pilerinarnerutilissallugu.

Powered by Labrador CMS