mittarfiit
Illussanik titartaasartunut mittarfissanik unammisitsisoqarniartoq
Kalaallit Airports A/S Qaqortumi, Ilulissani aamma Nuummi mittarfissani terminalip illutassaannut aamma illutassanut sullissiviusussanut illussanik titartaanermik unammisitsiniarpoq.
Kalaallit Airportsip siulersuisuisa aalajanerput Qaqortumi, Ilulissani aamma Nuummi mittarfissani terminalip illutassaannut aamma illutassanut sullissiviusussanut illussanik titartaanermik unammisitsisoqassasoq.
Tusagassiuutinut nalunaarut aallaavigalugu Kalaallit Nunaannut tunngasunik immikkooruteqarneq, ilaasut ilorrisimaarnerat aamma niuernermik tunngaveqartumik ingerlataqarneq siunnersuutini qulequtarineqassapput.
- Ilaasunut pitsaasunik atugassaqartitsilernermi, Kalaallit Nunaannut aamma Kalaallit Nunaannit angalanermi sullitat ilorrisimaarnerannik naammagisimaarinninnerannillu annertusititsiinnarani, kisianni aamma ingerlatseqatigiiffiup ingerlanneqarneranut aningaasaqarnikkut annertuumik iluaqutaasinnaassasoq, siulersuisunut siulittaasoq Johannus Egholm Hansen oqarpoq.
Illussanik titartaanermik unammisitsinermi peqataanissamut piukkunnartussarsiuussinermut qaaqqusissut 2017-imi juunimi nassiunneqassaaq.
Piukkunnartussarsiuussinerlu illussanik titartaasartut unammivissaat 2017-imi aggustimi ingerlanneqassaq. Taamaammat taakku siunnersuutitik novembarimi tunniutereersimassavaat.
Kalaallit Airportsi mittarfinni niuerfeqalernissamut imaluunniit allaffinnik attartornissamik soqutiginnissimasinnaasut, peqataaqqusilluni kaammattuivoq.