Kulusuk
Illumi silataani nannuttoq
Nanoq inersimasoq Kulusup nunaqarfiani ataasinngornerup tungaanut unnuami pisarineqarpoq
Piniartoq Gedion Kúnak Kulusumi illumi silataani ataasinngornerup tungaanut unnuami nannuppoq. Nanoq inersimasoq nunamut qaqinermi kingorna Gedion Kúnakkut kuuffiata tikka naamalersimagunarlugu qaninngarsimavoq.
Tunumi ileqqutoqaq malillugu Gedion Kúnaap pania Justine Kúnak nannuttuuvoq. Tassa ileqqoq malillugu nannumik takunneqaartoq nannuttuutinneqartarmat.
- Unnuap qeqqariilaartoq panitta nanoq illutta silataaniittoq takulersimavaa. Qoorortoora piareersimajuaannarpoq. Nanoq illutsinniit meterinik pingasunik ungasitsigisoq aallaavara, Gedion Kúnak Sermitsiaq.AG-mut oqarpoq.
Nanoq naapingajappaa
Paasinarsivoq nanoq angutiviaasoq inersimasoq assullu puallaarissoq. Umiatsiat sissamiittut eqqaasigut nanoq qaqisimavoq Gedion Kúnakkullu illuata tungaanut ingerlaarsimalluni.
- Qanittumi nuliara puisip amianik qapiarnikuuvoq imerlu atukkani kuuffikkut kuutsillugu aammalu imeq aattaqalersimalluni. Ilimagaara nannup puisip amiata tikka naammalersimallugu illutsinnut ingerlaarsimanissaa, Gedion Kúnak oqarpoq.
Taassuma eqqissiallaatigaa nannup takkunnissaa sioqqullugu panini angerlamut apuussimammat. Pisormi sioqqutitsiarlugu pania inuusuttut allat peqatigalugit aneersimavoq. Angerlamut apuuteriitsiaannarluni silammut itsuarluni nanoq illumi silataaniittoq.