Illumi perulluliornerit 17-it

Nuummi Politiit sapaatip akunnerani qaangiuttumi ulloq unnuarlu nalunaarusiaannit takuneqarsinnaavoq illumi perulluliornerit 17-iusimasut, illumi perulluliorfiusumi ataatsimi meerartaqarsimalluni. Taamaakkaangat tamatigut isumaginninnermik sulisup politiit peqatigalugit ilaqutariit oqaloqatigisarpai. Illumi perulluliornerit amerlanersaat sapaatip akunnerata naanerani pisimapput.

Aalakoortut arfineq-marluk politiinit ikiorneqarsimapput, angerlartinneqarlutik imaluunniit isertitsivimmi sinitsitassatut tigusarineqarlutik.

Aqqusinermi perulluliornerni pingasuni politiit akulerussimapput. Tassaanerusarput aqqusinermi assortuunnerit, inuit politiinit isumaqatigiitsinniarneqartarlutik.

Tamatuma saniatigut politiit aserorterinernut sisamanut, imminut toqunniarlutik sioorasaarisunut sisamanut imminullu toqoriartunut marlunut ornigussimapput. Ilaatigut arnaq inuusuttut imaanut imminut igeriussimavoq, nukappiaqqanilli saneqquttunit marlunnit annaanneqarpoq. Kinguninngua politiit ambulancelu takkupput annaassiniarnerlu tigullugu.

Isumaginninnikkut suliassat pingasuusimapput, ilaatigut suliassami ataatsimi politiit isumaginninnermik ingerlatsivik meeqqamik pinngitsaalillugu arsaarinninnermi ikiorsimallugu.

Nakuusernerit arfinillit nalunaarutigineqarsimapput. Nakuusernermik suliassat arlaliupput, ataaseq suli misissorneqarluni. Taamaattumik tamakkua pillugit politiit oqaaseqarsinnaanngillat.

Illup qaliani parnaaqqasumi sikkilimik aallarussisoqarsimavoq. Pisiniarfinni tillinniarnerit arfinillit. Tillinniarnerit pingasut. Suliassami ataatsimi ilaatigut Iphone aamma Ipad inissiamit tillinneqarsimapput. Tillinniat nalinginnaasumik nuannarinerusarpaat telefonit qarasaasiallu. Taamaattumik politiit kajumissaaripput tamakkua immikkut paarilluartaqqullugit.

Sapaatip akunnerata ingerlanerani arnaq taxamut akiligassaminit qimaavoq. Taxartartup kinorna arnaq politeeqarfiliaappaa.

Tamatuma saniatigut poortukkanik nunanit allaneersunik Nuummi akitsuuserisut misissuisimapput, hashimillu nassaartoqarsimavoq.

Aamma peqquserlunneq ataaseq, tassani pisiniarfiup matunissaanik akisussaasoq karsimit aningaasanik amerlavallaanngitsunik tigusisimalluni.

Sapaatip akunnerata ingerlanerani tigusat qulingiluat politiit isertitsiviiniitinneqarput.

Tamatuma saniatigut Politiit sukkavallaamik biilernerit 15-it suliarisimavaat, aammalu telefonimik tigumiartakkamik oqalullutik biilertut pingasut unitsinneqarlutik.

Politiit aamma Suloqqami ilinniarnertuunngornianut elevatorimit anisinnaanngitsunut qaaqquneqarsimapput. Gymnasiami atuartut arfineq-pingasut ulloq kingulleq atuarnertik nalliussisimavaat, qularnanngitsumillu elevatorimi pississaarsimallutik, elevatori unitsillugu. Politiit tamatumunnga oqartussaasut attaveqarfigaat ilinniartullu arfineq-pingasut kinguninngua elevatorimit anisinnaanngorput.