Aallaasersorneq

Illumi perulluliorneq aallaanninnermik kinguneqarpoq

Angut 45-nik ukiulik sapaatit akunnerini arfinilinni tigummigallagassanngortinneqarpoq, atorfilimmut sulisumut nakuusersimasutut unnerluutigineqarluni

Angut 45-nik ukiulik ullumi kingusinnerusukkut Nanortalimmit Nuummi Dronning Ingridip Napparsimmavissuanut aallarunneqassaaq, tassani aallaatinnerminik marlunnik passuneqassalluni.
Taanna tallimanngormat ualikkut tigusarineqarpoq, politiinik marlunnik savinnik marlunnik qunusaarinerata kingorna. Politiit illumi perulluliornermut ornigussimapput, tassani angut 45-nik ukiulik silaarutaasarluni kamattpoq.
Pissutsit erloqinartorujussuanngorput, politiillu aappaata angut susinnaajunnaarsinniarlugu illuinnarsuunni amoriarlugu aallaasariaqarsimavaa.
– Politiip angut niuatigut marloriarlugu aallaavaa. Aallaaffigitinnerminut siullermut angut qisuarianngilaq taamaattumillu politiip aallaaqqippaa, unnerluussisuuneq Morten Nielsen Sermitsiaq,AG-mut oqaluttuarpoq.
Angut 45-nik ukiulik tunniutiinnarpoq Nanortalimmilu napparsimmavimmi passunneqarluni inuunerminillu ulorianartorsiunngilaq.
– Angut tigusarineqarnerminut atatillugu pissusilersorsimaneranik paasissutissat tunngavigalugit unnerluutiginearpoq, unnerluutigineqarninili suli isummerfiginngilaa pisimasoq eqqaamasaqarfiginnginnamiuk. Pisinnaaleriarpat killisiorneqassaaq, unnerluussisutut fuldmægtigi Tanja Søderholm oqarpoq.
Angut 45-nik ukiulik pinerluttulerinermik inatsimmi § 37-mik unioqqutitsisimasutut unnerluutigineqarpoq sapaatillu akunnerini arfinilinni tigummigallagassanngortinneqarluni.
Politiit aallaammik atuinerini suliassat tamaasa assigalugit taamatut aallaasip atorneqarnerani pisimasut aamma misissuiffigineqassapput. Tamatuma inernera Kalallit Nunaanni Politiinut Maalaarurteqartarfimmut kingorna saqqummiunneqassaaq.
Maalaaruteqartarfik suliassamik taamattumik kingullermik suliaqarpoq 2009-mi politiip Qasigiannguani illuinnarsuunni atormagu. Taamanikkut politiip angut taliatigut aallaavaa.

Powered by Labrador CMS