Illuatungiliuttut siusinaarluni qinersineq nuannaarutigaat - naalakkersuisoqataasut pakatsipput
Inatsisartut isumaqatigiittut apriilip 24-anni qinersisoqarnissaa akuersissutigaat
Siumup oqaaseqaateqanngitsup saniatigut Demokraatit nangaassuteqaratik partiini kisiartaallutik siusinaarluni qinersisoqarnissaanik tapersersuisuupput.
- Qinersinissap nalunaarutigineqarnera nuannaarutigaarput, partiimi siulittaasoq Randi Vestergaard Evaldsen, ullumi suliarinninnermi naatsumik taama oqaaseqaateqarpoq.
Akerlianik naalakkersuisoqatigiit suliartik naammasseqqaarsimasariaqaraluaraat, Siumup naalakkersuisoqatigisai Inuit Ataqatigiit aamma Partii Naleraq isumaqarput.
- Inatsisissatut siunnersuutit pingaarutillit naammasseqqaarnissaat naatsorsuutigisimagaluarlugu isertuutissanngilarput. Naalakkersuisut siulittaasuata maanna qinersisoqarnissaa aalajangiussimammagu uggoraarput. Kisianni tusaatissatut tiguarput, Sara Olsvig (IA) oqarpoq.
Anthon Frederiksenip Partii Naleqqameersup aalisarnermut inatsisip naammassillugu suliarineqannginnera pakatsissutigisorujussuuaa. Kisianni suliassat allat aamma suliarineqanngitsuulerput.
- Aamma assut uggoraarput timmisartunut suluusalinnut mittarfiit piorsaqqinnissaannut aningaasalersuinissanut pilersaarutit kinguarsaqqinneqarlutik unitsiinnarneqarallartussanngornerat, tassami takornariaqarnermik inuussutissarsiuteqartut allallu nunami inuussutissarsiuteqartut taamaaliornikkut pilersaarutiminnik piviusunngortitsisinnaaneraluat kinguarsarneqartussanngormat, taanna oqarpoq.
Michael Rosing siullermeerluni Suleqatigiissitsisut sinnerlugit oqaaseqartup upernaakkut ataatsimiinneq sioqqullugu qinersinissamut aalajangiussineq, ataatsimiinnerup qineqqusaarfiunnginnissaa pinngitsoorniarlugu paasisinnaanerarpaa. Kisianni Inatsisartut immikkut ittumik ataatsimiitinneqarnissaannut qaaqquneqarnerat pisariaqanngitsoq isumaqarpoq. Upernaakkut ataatsimiititsinerup aallartinnerani ullormi siullermi qinersinissaq nalunaarutigineqarsimasinnaagaluarpoq.
- Partiinngorlaatut atsiornernik katersileruttortugut qinersinissaq suaarutigineqarpoq taamaattumik Partiit marluk nutaat aappaani siulittaasutut eqqarsarpunga arlaatigut torrallaariartoqarsimagaluarnersoq, taanna oqarpoq.
Qulartoqaraluartoq apriilip 24-anni qinersisoqarnissaa, Inatsisartut tamarmik isumaqatigiittut taasissutigaat.