Illuatungiliuttut ataatsimoortut: Aleqa, qinersisoqarli

- Qinersisoqarli.

Inuit Ataqatigiit, Partii Naleraq, Demokraatit Partii Inuit siulittaasui ataatsimut Naalakkersuisut siulittaasuannut Aleqa Hammondimut Siumumeersumut oqariartuuteqarput.

Partiini taakkunani siulittaasuupput Sara Olsvig, Hans Enoksen, Anda Uldum aamma Nikku Olsen - ataatsimoorlutik tusagassiutinut nalunaaruteqarput.

- Illuatungiliuttuusugut naalakkersuinikkut pisunut naammaginnikkunnaarluta tusagassiorfitsigut nalunaaruteqarpugut. Inuit Ataqatigiit, Parti Naleraq, Demokraatit aammalu Parti Inuit isumaqarpugut naalakkersuisooqatigiit iluminni avissaartuunnerat ataatsimoorfeqaratillu sangujoraartumik aqutsiniarnerat naammalersoq. Nunarput inuiaqatigiillu kalaallit Naalakkersuisunut ilaasortanit ataasiakkaanit aqunneqarsinnaanngillat, ataatsimut allapput.

- Naalakkersuinikkut massakkut pisut Nunatta inissisimaneranut assorujussuaq ilungersunarput. Tusagassiorfitsigut tusarparput takullugillu Inatsisartunut ilaasortat Siumumeersut marluk 2015-mut aningaasanut inatsisissamut akerliullutik taasiniartut. Tupinnarneruvorlu Aalisarnermut Naalakkersuisoq aalisakkanut akitsuusersuinissamut Aningaasaqarnermut Naalakkersuisup saqqummiussaanut akerliulluni oqarmat ilanngullugulu aalisartut aallerfigineqarnissaannik aningaasanut inatsit siunertaqanngitsoq aamma taamatut aalajangiisoqarnikuunngitsoq, suleqatigiissitarlu aalisarnermut tunngasunik sulialik aallartinneqarsimasoq ilisimanagu oqarluni, isornartorsiuillutik allapput.

Illuatungiliuttut: Naalakkersuisut avissaartuupput
Tusagassiutinut nalunaarummi ilaatigut oqaatigineqarpoq, Naalakkersuisooqatigiit malunnartumik ataatsimuunngitsut.

- Naalakkersuisooqatigiit tunuliaqutaqanngillat. Pisariaqarluinnalerpoq eqqortumik aki-sussaassuseqartumillu nunatta aqunneqarnissaa. Inatsisartut immikkut ataatsimiigiaqquneqarnissaat qinnutigisariaqarparput, Naalakkersuisullu Siulittaasuat qinersinis-samik nalunaaruteqartariaqarpoq akisussaaffini naapertorlugit nunatta iluamik patajaatsumillu aqunneqarnissaa timitalerumallugu, Inuit Ataqatigiit siulittaasuat Sara Olsvig, Partii Naleqqap siulittaasua Hans Enoksen, Demokraatit siulittaasuat Anda Uldum kiisalu Partii Inuit siulittaasuat Nikku Olsen allapput.

Inatsisartuni amerlanerussuteqartut
Naalakkersuinikkut ingerlatsisut Siumut aamma Atassut katillutik 16-nik Inatsisartuni ilaasortaatitaqarput, illuatungiliuttut Inuit Ataqatigiit, Demokraatit, Partii Naleraq Partii Inuillu katillutik 15-nik ilaasortaatitaqartut.

Siumumi Inatsisartuni ilaasortaq Kristian Jeremiassenip nalunaarutigisareerpaa Inatsisartunut tulliani qinersinermi qinigassanngortissanani.

Pisoq pillugu Naalakkersuisut siulittaasuat Sermitsiaq.AG-mit oqaaseqartinnissaa sulissutigineqarpoq.