Illoqarfinni tallimani eqqakkanik saliisoqarpoq
Illoqarfiit amerliartuinnartut suliffeqarfiit saliinerannut Saligaatsumut peqataasarput
Ilulissani juunip arfineq-aappaat Saligaatsoq ingerlanneqarpoq,
tassanilu suliffeqarfiit 16-it saliisullu 80-it peqataapput. Eqqagassat 15 m3-isut annertutigisut tonsinngorlugulu 15-18 tonsitut oqimaassusillit katersorneqarsimapput. Ilulissani Saligaatsumik ingerlatsisoq, Ilannguaq Møller, INI A/S-iminngaanneersup saliineq ingerlalluartutut nalilerpaa. CSR Greenland tusagassiuutinut nalunaarummi taama allappoq.
Juunip 12-iani INI A/S Sisimiut aamma peqataasorpassuaqarluni
saliisitsivoq. Saligaatsumilu saliisitsisoqartarnerani Sisimiut ukiut
arlerpaat peqataasarluni.
Saligaatsoq Maniitsumi Nuummilu juunip 14-iani ingerlanneqarpoq. Ulloq taanna sila masannartulioraluartoq peqataasut sila soqutiginagu peqataasut saliipput, pinngortitamilu saliiffiusumi eqqagassat 4 tonsit katersorneqarsimallutik. Ukioq manna Maniitsoq siullermeerluni Saligaatsumi peqataavoq, ukiup tullianilu aamma peqataaqqinniarluni.
Ukioq manna Nuumminngaanniit saliisut 450-500-jut missaanni amerlassuseqarput, ukioq kingullermullu sanilliullugu peqataasut ikinnerumaarput, 600-t missaat peqataasimammata. Aaqqissuisut oqarnerat naapertorlugu Saligaatsup ingerlanniarneqarnerata nalaani Pan Am ingerlanneqarneranik pissuteqarsinnaavoq.
Aasianni arfininngormat Saligaatsoq peqataaffigineqarluarsimasoq ingerlanneqarpoq. Saliineq ima ingerlalluarsimatigaaq bilinik eqqakkanik aallertartut malinnaasinnaasimanatik, allaat aqaguani eqqakkanik katersinertik ingerlateqqittariaqarsimallugu.