Suliffissaaleqisut
Illoqarfinni pingasuni suliffissaaleqisut ikileriartut
Nunatsinni suliffissaaleqisut ukioq manna maajumit ukioq kingullermi maajimit assigiiginnartut Naatsorsueqqissaartarfiup kisitsisaataani takuneqarsinnaapput. Illoqarfinnili assigiinngitsuni suliffissaaleqisut ikiliartorput
2015-imi maajimi nunatsinni suliffissarsiortutut nalunaarsukkat 3.752-iupput, taakkunani 606-t nunaqarfinneersuullutik.
Tamatuma takutippaa qaammammi ukiup siulianut sanilliullugu suliffissarsiortutut nalunaarsukkat tallimanik ikileriarnerat.
Kisitsit illoqarfinni nunaqarfinnilu allanngoriangaatsiarsimasoq takuneqarsinnaavoq.
Nuummi suliffissaaleqisut ikilisut
Assersuutigalugu Nuummi suliffissaaleqisut ukiup ataatsip ingerlanerani 26 procentimik ikileriaateqarput, maannakkut 760-nik suliffissaaleqisoqarluni. Taanna pissutaalluni suliffissaaleqineq annertuserianngilaq.
Ilulissani suliffissaaleqisut 9 procentimik ikileriarput, 241-t suliffissaaleqisuullutik.
Aamma Aasianni suliffissaaleqisut ukiup ataatsip ingerlanerani ikileriarput, tassami 24 procentimik ikileriaramik, maannakkullu inuit 160-it suliffissaaleqisuullutik.
Suliffissaaleqisut amerleriartut
Illoqarfinni assigiinngitsuni ineriartorneq killormut ingerlavoq.
Sisimiuni suliffissaaleqisut 20 procentimik amerleriarput, 367-iulerlutik. Qaqortumi suliffissaaleqisut 21 procentimik amerleriarput, 226-ulerlutik.
Aamma illoqarfinni assigiinngitsuni taamaappoq.
Qeqertarsuarmi suliffissaaleqisut 118 procentimik qaffariarujussuarput, 85-nik suliffissaaleqisoqarluni.
Qasigiannguani suliffissaaleqisut marloriariaatingajammik amerleriarput, 119-iulersimallutik.
Tasiilami kisitsit 65 procentimik qaffariarpoq, 383-nik suliffissaaleqisoqarluni.
Kangaatsiami suliffissaaleqisut 171-iupput, 38 procentimik qaffariarluni.
Maniitsumi aamma suliffissaaleqisut amerleriarput ukiup ataatsip ingerlanerani. Inuit 236-t suliffissaaleqisuupput, 19 procentimik amerleriarlutik.
Nalunaarsuinerit
Suliffissarsiorlutik nalunaarsukkat saqqummersinneqartarput kommuninut suliffissarsiorsimasut tunngavigalugit. Qaammammi inuk ataaseq suliffissarsiortutut naatsorsugaasarpoq, qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu.