Illoqarfinni arlalinni hashimut akerliussutsimik takutitsineq

- Juunip ulluisa 26-anni hashimut naaggaarnerput takutinniarlugu angalaaqatigiissaagut.

Peqqissutsimut naalakkersuisoq Agathe Fontain, nunarsuaq tamakkerlugu ikiaroornartunik atornerluinerup- inatsisinillu unioqqutitsilluni tuniniaanerup akiorneqarnissaannut ulloritinneqarnera malunnartinniarlugu taama oqarpoq.

- Taamaaliorneq ersarissumik isummernermik hash-imut akiuiniarnermi ataatsimuussutitsinnik immitsinnullu soqutiginninnitsinnik takutitsivoq. Innuttaaqatigut hashimik atornerluisuusut ataqqinnilluta assatsinnillu isaassivigalugit naapissavagut, taanna erseqqissaavoq.

Peqqissutsimut naalakkersuisup meeqqat inuusuttullu akornanni atuinerup annertusiartornera ingammik ernumanartippaa.

- Meeqqat inuusuttullu akornanni atornerluinerup annertusiartornera pingaarnertut ernumassutigaara. Hashimik atuinerup inuiaqatigiittut akuerinnginnerata inuusuttunut ersarissumik oqariartuutiginissaa pingaaruteqarpoq. Innuttaasut amerlasuut nunatsinni sumiiffinni assigiinngitsuni akerliussutsimik takutitsinernut peqataanikkut tapersersuinerminnik takutitsinissaat neriuutigaara. Peqatigiilluta hashimik ajornartorsiuteqarneq iliuuseqarfigisinnaavarput, Agathe Fontain oqarpoq.

Meeqqat inuusuttullu hashimik misiliisimasut akuttunngitsunilluunniit hashimik pujortartartut amerlisimanerat innuttaasut peqqissusaannik misissuisitsinerup kingulliup 2014-imi pisup takutippaa. 2006-imi 15-inik ukiullit 17 procentii hashimik pujortarneq misilissimavaat 2014-imilu 15-inik ukiullit hashimik pujortarnermik misiliisimasut 26 procentimut qaffassimapput. Pingaartumik angutit inuusuttut 18-iniit 24-inut ukiullit akuttunngitsunik hashimik pujortartarnerarput.