Siorarsiorfik

Illoqarfimmut pilersaartut taamaammat agguarneqassaaq

Illoqarfiit pingaarnersaannut pilersaarut annertooq, inissianik nutaanik 1600-nik, atuarfinnik pingasunik, atuareersunut paaqqinnittarfinnik pingasunik, meeqqerivinnik qulinik aamma illoqarfiup immikkoortuanut nutaamut Siorarsiorfimmut aqqutissaq sulianut mikisunut agguarneqassaaq. Tamanna nassuiaatissartaqarpoq.

Pilersaarut februaarip aappaanni saqqummiunneqaqqaarmat, pilersaarut ataatsimoortillugu suleqatigiissitarsuarmit neqeroorfigineqarnissaa takorloorneqaraluarpoq.

Ataatsimoortinnissaanut nalorninartoqartoq
- Angisuutut ataatsimoortunngorlugu neqeroortitsinissaq ajornakusoorpallaarlunilu illoqarfimmik inerisaanermut akitsorsaataasinnaanera nalorninartortaqarpallaarpoq. Nutaamik ilusilerlugu iluanaarnerusinnaavugut, entreprenørit mikisut angisuullu neqeroortissinnaanngorlugit ajornanngippallu allanik ingerlatseqateqartillugit, Kommuneqarfik Sermersuumi kommunaldirektøri Lars Møller-Sørensen oqarpoq.

Kommunip illoqarfimmik ineriartortitsinermi selskabi kommunimit pigineqartoq pilersippaa. Selskabip suliassaa tassaassaaq Nuup illoqarfittut inerisarneqarneranik aningaasalersuineq, ineriartortitsineq, piareersaaneq, sanaartorfissagissaaneq.

Aamma atuaruk: Illoqarfiit pingaarnersaani pilersaarummut aningaasat 1 milliardid Kommuneqarfik Sermersuup ima nassaarissavai

- Illoqarfimmik ineriartortitsinermi selskabiliornikkut suliap ingerlanera pilertornerusumik ingerlasinnaanngussallunilu pituttugaavallaannginnerulissaaq. Nuummi atuartut amerliartornissaat maannakkut naatsorsuutigisatsitut issanngikkaluarpat, amerlassusaat naapertorlugu annertusarneqanngikkuni annikillisarneqarsinnaavoq. Ataatsimoortunngorlugu neqeroortitsisoqassappat piffissami sivisuumi aningaasarpassuit atorlugit pituttorsimasoqalersinnaanera nalorninaateqarpoq. Politikerit siunissamut ungasinnerusumut anguniagassaliorlutillu ineriartortitsinissamut pilersaarusiussapput, taava suliassartaanut suliassanullu sukumiisunut tunngasut Illoqarfimmik ineriartortitsinermi selskabimit isumagineqassapput, Lars Møller-Sørensen kommunip nittartagaanut taama oqarpoq.

Qinikkat tamarmik isumaqatigiittut
Kommunalbestyrelsimi ilaasortat tamarmiusut - Siumut ilanngullugu - pilersaarut taperserpaat. Siumup siulittaasuata Kim Kielsenip suliniut ''isumaannakkut pilersaarutitut'' oqaatigereeraalu, Siumup qineqqusaartoqarnerani pilersaarutaasimasoq itigarteriasaaraluarpaat.

Powered by Labrador CMS