Illoqarfiit pingaarnersaat allerusuttoq
Nuuk alliartussaaq, annertuumillu inissianik attaveqaatitigullu aningaasaliisoqartariaqarpoq 2030-mi innuttaasut illoqarfiit pingaarnersaanni najugaqartussatut ilimagineqartut tikilluaqqusinnaaniarlugit. Siunissamili Nuummi inuussutissarsiutit naleqartunik pilersitsiffiusut suussappat, ilisimatooq aperaaq
Sapaatit akunnerani qaangiuttumi Nuummi 5 milliard koruunit atorlugit mittarfiliornissaq illoqarfimmillu piorsaanermik suliniut Siorarsiorfik pillugit Arctic Clusters of Raw Materials Dansk Industrimi ataatsimeersuartitsivoq.
Nuummi innuttaasut amerlinissaat ilimagineqarluinnarpoq: 2030-imi 30.000-iulissaagut. Nutaamilli mittarfiliunngikkutta inissialiornatalu tamanna angunavianngilarput, kommunaldirektøri Lars Møller-Sørensen aallaqqaasiinermini Sermitsiamut oqarpoq.
- Pissutsit piviusut qimerloorutsigik Kalaallit Nunaanni innuttaasut amerlassusaat taamaaginnangajappoq. Saniatigut Nuummi innuttaasut sukkasuumik amerliartorput. Innuttaasut 18.000-ngoriartorput, inuttunerulersarneralu oqaluttuarisaanermut atatillugu qimerloorutsigu inissianik sanaartortoqarnerata nalaani Nuuk inuttunerulersarpoq. Kommunitut suliassatta pingaarnersaraat allat aningaasaliinissaannut tunngavissiinissarput, Sermitsiamut oqarpoq, nangillunilu:
- Ukiualuit matuma siornagut ima misigisimavunga Nuummi illoqarfiup piorsarnissaa oqaluuserigaangatsigu asuli oqaluttartugut. Taamaakkunnaarsimavoq. Pissutsit ilusinikkiartortut takusinnaavarput. Tamannalu tulluussimaarutigilaarparput. Sapiiserlunga ima oqarusuppunga maannakkut inissialiunngikkutta 2030-mi Nuummi 30.000-inik inoqarnavianngitsoq. Aamma isumaqarpunga Nuummi inuit 30.000-it najugaqarnavianngitsut Nuummi mittarfik tallinngikkutsigu. Aamma isumaqarpunga Nuummi innuttaasut 30.000-inngornavianngitsut inuussutissarsiornikkut suliniutit takkuttussat piorsarneqanngippata. Taamaattumik ineriartortoqarsinnaaqqullugu tunngavissanik pilersitsinissaq pingaartipparput, kommunaldirektøri oqarpoq.
Allaaserineqartoq Sermitsiami tamakkiisumik atuaruk. Aviisi uani pisiarineqarsinnaavoq:
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
