illoqarfiit pingaarnersaat
Illoqarfiit pingaarnersaannut Asii periusiorniarpoq
Nuuk Kalaallit Nunaanni kikkunnut tamanut illoqarfiit pingaarnersarissavaa politikkikkut, inuussutissarsiornikkut, kulturikkut, timersornikkut nunanullu tamalaanut atatillugu
Nuuk Kalaallit Nunaanni illoqarfiit pingaarnersarissavaat nunami kikkut tamarmik tulluusimaarutigisinnaasaat.
Taamaattumik illoqarfiit pingaarnersaannut periusissaq, borgmester Asii Chemnitz Narupip marlunngorpat Kommuneqarfik Sermersuumi kommunalbestyrelsimut oqallisigitinniarpaa. Takuuk ullormut oqaluuserisassani ilanngullugu nassiussami immikkoortoq 05D.
Borgmesterip siunniuppaa Nuummi naammattunik inissiaqassasoq, illoqarfik najugaqarfigissallugu pilerinartooqqullugu. Sermitsiami sapaatip akunnerani uani saqqummersumi allaaserisaq naapertorlugu 800-nik inissialiorniarpoq, taamaasilluni inuit illoqarfimmut nuukkusuttut aamma inissaqaqqullugit.
– Illoqarfinngorsaaneq unitsissinnaanngilarpuyt, tdaanna oqarpoq.
Tamatuma saniatigut borgmesterip inuussutissarsiutit ineriartornerat aallartitsisullu pitsaasunik sinaakkutassaqarnissat qulakkeerniarpaa, borgmesterip ilaatigut tikkuarpaa attaveqarneq. Marlunngorpat kommunalbestyrelsip ataatsimiinnerata ilaani matoqqasumi Nuummi mittarfiup allineqarnissaanut pilersaarut oqaluuserineqassaaq.
Borgmesterip sanaartorneq aallartikkusuppaa immikkullu tikkuarlugu takornariaqarneq aammalu sumiiffimmi nerisassaatit atornissaat sammineqassasut.
Illoqarfiit pingaarnersaanni politikkikkut ingerlatsinermut inissaqassaaq, Kalaallit Nunaanni Issittumilu ineriartorneq pillugu ataatsimiittarnernik ataatsimeersuartarnernillu.
Eqqumiitsulioriaatsinik tamanik kiisalu timersornermik sammisaqartoqarsinnaassaaq, borgmesteri isumaqarpoq.