Siorarsiorfik
Illoqarfiit pingaarnersaanni misissueqqissaarneq professorip "ataannarsinnaannginnerarpaa"
Nuummi innuttaasut 2030-mi 5.000-it aamma 9.000-it akornaanni amerleriaateqarnissaat EY-imit inuiaqatigiit aningaasaqarnerannut sunniutissanik nalilersuinermi tunngavigineqartoq suliamut tunngasunik ilisimasalittut isigalugu tunngavilersuutitsialaanngilaq, professori oqarpoq, Nuummilu siunissami innuttanngortussat inuussutissarsiornikkut tunngavigisassaat aamma apeqquserlugit
– Inuiaqatigiit aningaasaqarnerannut sunniutissanik nalilersuineq tamakkiisuunngilaq. Isumaqarpunga ilaannakuusumik nalilersuinerusoq innuttaasut amerlanerusut aningaasaqarnikkut siuariarnermik isumamineersumik pilersitsinissaannik ilimagisamik navianartumik tunngaveqartoq. Nalilersuinermilu inerniliissutigineqarpoq, inuiaqatigiit aningaasaqarneranni siuariarneq inissianik, atuarfinni ulluuneranilu paaqqinnittarfinnik amerlanerusunik sanaartornikkut pilersinneqassasoq. Tunngavilersuut soqutiginaateqarpoq. Sanaartornerup annertuup inuiaqatigiit aningaasaqarnerannit nakerisarsiunngitsumik isigalugu siuariarnerugallartumik kinguneqarnissaa erseqqippoq. Kisianni sanaartorneq pisortat namminersortullu aningaasaliissutaat aqqutigalugit aningaasalersorneqartussaavoq, taakkualu kingorna innuttaasunit akileraarutitigut isertitanit akilerneqartussaallutik. Kisianni innuttaasut inuussutissarsiornikkut tunngavigisassaat suuppat?, Ulrik Jørgense, Aalborgip Universtitianinngaanneersoq aperivoq nangillunilu:
Isornartoqartoq
Tamanna nalorninaateqangaatsiarpoq, Kalaallit Nunaanni ineriartornermi isornartoqartut ilaanni inuussutissarsiutitigut tunngavissanik, Kalaallit Nunaanni isumaginninnikkut pissutsit niuernerullu oqimaaqatigiissinneqarnerata pitsanngorsarneqaatigisinnaasaannik, ineriartortitsinissaq pineqarpiarma. Kommuneqarfik Sermersuumi innuttaasut illoqarfimmik ineriartortitsinissamut anguniartoorujussuarmut aningaasaliissutigineqartussatut pilersaarutigineqartut malitsigisaannik akiitsoqalersinneqarnissaat aarlerinaateqarpoq.
Taama Aalborg Universitetimi pilersaarusiornermut ilisimatusarfimmi, Institut for Planlægningimi, professori, Ulrik Jørgensen, inuiaqatigiit aningaasaqarnerannut nassataasussanik nalilersuineq kukkunersiuisut suliffeqarfiannit EYimit Kommuneqarfik Sermersooq sinnerlugu suliarineqarsimasoq pillugu, oqarpoq.
Professori naapertorlugu Nuummut Kalaallit Nunaannullu iluanaarutissarujussuit naatsorsornissaannut Nuummut 2030mi nuuttussat 5.000it aamma 9.000it akornanni amerleriaateqarnissaannik nalilersuinermi tunngaveqarneq suliamut tunngasunik ilisimasalittut isigalugu tunngavilersuutitsialaanngilaq.
Suliassarpaaluit qitiusumut eqitertinneqartut
– Nuummi ukiut kingulliit 1012 sanilliullugit qiviaraanni illoqarfik 2.000it missaannik inuttunerulersimavoq. Kisitsimmut tassunga ingerlatsiveqarnikkut suliassarpaalussuit qitiusumut eqitertinneqarsimanerat annertuumik malunnaataavoq. Tassa imaappoq, suliassanik Kalaallit Nunaanni sumiiffinnit allanit Nuummut nussuisoqarsimavoq. Tamatuma qaavatigut Nuummi sanaartugassat annertuut umiarsualivillu nutaaq suliarineqarsimapput tamatumalu peqatigisaanik nunaqarfinni illoqarfinnilu mikinerni arlalissuarni inissianik aserfallatsaaliuineq ukiorpanni sumiginnarneqarsimalluni. Tamatuma kinguneranik Nuuummi sanaartorneq annertusiartorsimavoq. Siuariartorneq taamaalilluni politikkikkut pingaarnersiuinernit ingerlanneqarpoq. Taamaalilluni siuariartorneq aalisarnerup, aatsitassarsiornerup inuussutissarsiutilluunniit tunngaviusut allat annertuseriarsimanerannik tunngaveqanngilaq. Naatsorsueqqissaartarfimmit paasissutissat qimerlooraanni ineriartornissamut missingiinermi isumalluarpaluttumi ukiuni tulliuttuni 10 12ini nuuttussat 1.000it aamma 2.000it akornanniissapput. Nutserarneq tamanna attaveqaatitigut aqqusersuutini pingaarnersiuinerit ingerlanneqareersut, ilaatigut Nuummik Kalaallit Nunaanni nioqqutissanik siammarterinermi qitiusoqarfinngortitsisut, malitsigisaattut inissisimareerpoq. Nuummi nukittunerujussuarmik siuariartortoqassappat tamanna Kalaallit Nunaanni sumiiffinni allani annaasaqarnermik isumaqassaaq, tamannalu inuiaqatigiit aningaasaqarnerannut nassataasussanik nalilersuinermut ilanngunneqartariaqaraluarpoq, Ulrik Jørgensen oqarpoq.
Illoqarfiit pingaarnersaanni suliniut pillugu naliliineq Sermitsiaq aviisimi tamakkerlugu atuarsinnnavat, aviisi digitaliusoq uani pisiariuk: