Illluatungiliuttunut isornartorsiut: Naalakkersuisunut tatiginninnginneraaneq unitsissiuk
Illuatungiliuttut Inuit Ataqatigiit Partii Naleqqallu inuussutissarsiornermut naalakkersuisumut Aqqalu Jerimiassenimut tatiginnikkunnaarlutik nalunaaruteqarnerat, Inatsisartuni ilaasortap Bentiaraq Ottosenip (A) isornartorsiorpaa
- Inatsisartutut qinigaarlaajulluni nunatsinnilu politikkertariaatsimut pulaterluni assorsuaq tupannarpoq partiilersuunnerujussuaq qanoq annertutigisoq paasillugu. Allaammi politikkikkut aalajangigassat qitiutinneqaratik, politikkikkut pissaanermi inissisimaneq pingaarnerulersoortarluni.
Bentiaraq Ottosen tusagassiutinut nalunaaruteqarluni taama allappoq. Taassuma paasisinnaanngilaa sooq Partii Naleqqap, Inuit Ataqatigiinnit taperserneqarluni, inuussutissarsiornermut naalakkersuisumik Aqqalu Jerimiassenik tatiginnikkunnaarluni saqqummiussinera. Tatiginninnginnermilli saqqummiussineq Inatsisartuni amerlanerussuteqartut itigartitsissutigaat.
- Imaattussaanerpami partiip angorusutani sukataarutigippagit partiit allat uppiseqqaarlugit, tatiginanngitsutullu naqissuserniaqqaarlugit nammineq angorusutani angussallugit? Bentiaraq Ottosen aperivoq.
Partiit qineqqusaarnerminni suliniutigiumasatik piviusunngortittariaqaraat, taanna kaammattuivoq.
- Qaa qineqqusaarnitsinni isumalluarpalaartitsilluta suleqatiserinnikkusullutalu nipi atugarput piviusunngortitsigu.
- Pinnguanngilagut, aamma tamatta ilungersorpugut. Arlallu unioqqutitsilluni iliuuseqarsimappat, aap pisussaaffigaarput akueriinnarnagu kinguneqartissallugu. Kisiannili aamma periarfissat taamaattut pissaaneqarniunnermi atussanngilagut, Bentiaraq Ottosen allappoq.