Aningaasanut inatsit
Illersuisunik ilinniartitsinissaq suli qularnaateqarpoq
Illersuisunik ilinniartitsinissamut danskit aningaasanut inatsisaanni saniatigut aningaasaliissuteqartoqanngilaq. Taamaattorli aningaasat suli nassaarineqarsinnaapput.
Illersuisutut ilinniarfiup aappaagu aallartissinnaarnera suli qularnartoqarpoq. Tassami ilinniarfimmut danskit aningaasanut inatsisaanni saniatigut aningaasaliissuteqartoqanngilaq.
Pilersaarut malillugu ilinniarfik ukiormanna ukiaanerani aallartittussaagaluarpoq, kisianni nunap illersuisuunerata Finn Meinelip paasivaa, ilinniarfiup ingerlanneqarnissaanut naammanngitsunik aningaasaliissuteqartoqarsimasoq.
IA-p Folketingimut ilaasortaatitaata, Aaja Chemnitz Larsenip, saniatigut aningaasaliissutissat aningaasanut inatsimmut ilanngunneqannginnerat uggoraa.
- Tamanna danskit tungaannit qanoq pingaaruteqartiginersoq paasineqarsimanngitsoq tamatuma takutippaa, taanna Sermitsiaq.AG-mut oqarpoq.
Agguagassani nassaarineqarsinnaasut
Aningaasallu nassaarinissaannut suli periarfissaqarpoq. Tassami aningaasanut inatsimmi Kalaallit Nunaanni eqqartuussiveqarneq ataatsimut isigalugu ukiuni sisamani tulliuttuni ukiumut 10 millionit koruuninik aningaasaliissuteqartoqartarnissaat isumaqatigiissutaavoq. Illersuisutut ilinniartunut aningaasaliissutinit taakkunannga 6 millionit koruunit atorniaraanni pingaarnersioqqissaarnissaq pisariaqassaaq.
40 millionit koruunit taakku qanoq pingaarnersiorfiussanersut, Naalakkersuisut siunnersuutissamik sulissuteqaleruttorput.
- Taakku suliniutinut aningaasaliissutitut taasanni, taakku aningaasat tigussagutsigit uggoraara. Taakku aningaasaliissutit 2022-mi atorunnaarpata aamma tassa sorsuutigeqqittussaassagatsigit, Aaja Chemnitz Larsen (IA) oqarpoq.
Ilinniarfik aappaagu aallartissanngippat, illersuisunik amigaateqalersinnaanerup nunap illersuisuunerata Finn Meinelip ernumassutigaa.
- Ilinniarfiup kinguaattoornera ilungersunartorujussuuvoq, illersuisunimmi annertuumik amigaateqartoqarpoq, taanna novembarimi Sermitsiaq.AG-mut oqarpoq.