Brain drain

Iliuusissaq nutaaq: Aasaanerani atuanngiffeqarninni angerlarit!

Timmisartumut billetsimik aamma aasaanerani suliffimmik neqeroorutip inuusuttut ilinniarluarsimasut nunaminnut uternissaat pilerinarsassavaat

Ilinniartut peqatigiiffiisa Avalak, Ili Ili aamma SIK-p upernaaq naapinnerminni ilinniarsimasut Nunarput qimallugu aallartarnerat oqallisigaat

Inuusuttut nunagisaq qimallugu ilisimatusarfinni ilinniaqqissimasut affaannaat utertarnerat, Kalaallit Nunaata ajornartorsiutaasa annersaasa ilagaat.

Tamanna ajornartorsiut kommuunip inuttunersaata nutaamik iliuuseqarnermigut aaqqiviginiarsariniarpaa: 'Kalaallit Nunaannut angerlarlutit aasaanerani atuanngiffeqarninni suligit'.

Kommuneqarfik Sermersuumit ilinniartunik Kalaallit Nunaannut attuumassuteqartunik attaveqarnernik pitsaasunik pilersitsiniarluni kissaateqartoq kaammattuilluni taamak oqariartuuteqarpoq.

Isumassarsiaq nutaaq
Kommuneqarfik Sermersooq Danmarkimi ilinniagaqartunut Nunatsinni suliffissanik saqqummiinermi Danmarkimi ilinniakkanik qaffasissunik ingerlatsisunut pitsaasunik attaveqalernissamik siunertaqarluni peqataavoq.

Suliffissanik saqqummiinermi ilinniartut aasaanerani suliffissaannik neqeroorfigalugit pileritsatsinneqarput. Soqutiginninnerlu annertuvoq.

Atuaruk: Soorunami nunatsinnut uterumaarpugut

- Suliniut nutaaq ajunngitsuinnarnik qisuariarfigineqarpoq. Saqqummiinermut orniguttunit aasami atuanngiffeqarnerminni Nunatsinni sulinissamik periarfissinneqarsinnaanertik assut soqutigaat. Aasaanerani suliffeqarsinnaaneq pillugu paasissutissanik pissarsiniarlutik nerrivitsinnut orniguttut taamak amerlatigisut takullugit nuannaajallannaaq, kommuunimi ilinniarneq pillugu siunnersorti Malik Skifte, oqarpoq.

Akissarsiaqarnerup saniatigut billetsi
- Siunissami tamanna qanoq kinguneqarsinnaanersoq assut pissanngatigaarput.

Atuaruk: Aalborgimi Aarhusimilu kalaallit atorfinnik nittarsaanerat

Aasami atuanngiffeqarnerup nalaani Kommuneqarfik Sermersuumi sulinermi inuusuttut Nunatsinni sulinerup qanoq imaqarneranik pitsaasunik paasissutississavaat taassuma qaavatigut aasaanerani suliffik ilinniakkamut attuumassuteqarsinnaasoq misilinnissaa siunertaavoq.

Inuusuttut misilittagaqalernerup saniatigut akissarsiaqaatigalugu sulillutik angalanerminnut akiliunneqartassapput

Powered by Labrador CMS