Ilitsoqqussaralugu oqaatsit atorlugit ilinniartitsineq pingaarneruvoq
Suinni Johansen isumaqarpoq, meeqqat ilitsoqqussaralugit oqaatsit atorlugit ilinniartinneqartut ilikkallaqqinnerusartut.
Ilinniartitsisunngorniarnissamut piumasaqaatinik appaanissaq imaluunniit avataaniit tikisitsinissamik toqqaanissaq Suinni Johansenip qularutiginngilaa. Taannami isumaqarpoq ilinniartitsisut oqaatsitik atorlugit meeqqanik ilinniartitsinnaanerat pingaaruteqarluinnartoq, taamaanngippammi ilinniartitsineq ilikkariartortitsinerlu ajoquserneqarsinnaavoq.
- Periarfissat marluinnaapput, piumasaqaatit appartillugit ilinniarfissuarmi ilinnialerusuttunut immaqaluunniit avataaniit ilinniartitsisunik suliartortitsilluni kalaallisut oqalussinnaanngitsunik. Takornartat oqaasii atuartut suli ilikkarsimanngisaat, taanna tusagassiuutinut nalunaarummi allappoq.
Taannami isumaqarpoq, piumasaqaatinik appaasoqannginneratigut avataaniit tikisitat amerliartuinnarsinnaasut.
- Taamaammat atuartut ilikkagaqarnissaagaluat ineriartornissaraluallu innarligaassaaq.
- Ilinniartitsisormi nunarsuarmi pikkorinnersaat sumut atorsinnaassagatsigu meeqqat oqaluussinnaanngippagit?
Aasianni tv-kkut qineqqusaartitsisoqarnerani parteeqataanit Doris J. Jensenimit apeqqut tamanna qaqinneqarpoq. Ukiummi qulit qaangiuppata Ilinniarfissuarmi ilinniartitsisutut naammasissisartut amerliartunngippata ilinniartitsisut 300-t amigaatigineqalertussaapput.
Taamaammat ilinniartitsisunngorniartarnermut piumasaqaatit apparsarneqartariaqartut taanna isumaqarpoq, taamaaliornikkummi amerlanerit ilinniartalissapput. Suinni Johansenillu isumaqatigaa.
- Piumasaqaatit qaffasinnissaat kisimik pingaartinniaraanni inuit ineriartortuartuunerannik paasinninneq annaaneqarsinnaavoq.
- Inuk ilinniarnermini angusarissaarsimanngikkuni, nammineq inoqatigiinniluunniit ajornartorsiuuteqarsimaguni, kingusinnerusukkut perorluni pitsanngorsinnaavoq.
Ukioq kingulleq piumasaqaatit qaffanneqarput. Tamanna Ilinniarfissuarmi pitsaassutsip qaffasissussaanik isornartorsiuiulluni naliliisoqarnerata kingorna pivoq. Ilaatigut neriutigineqarsimavoq ilinniakkamik naammassinnittartut amerlanerulernissaat.
Suinni Johansenili isumaqarpoq, karakterit apparneqarsinnaasut. Taamaasiornikkut Ilinniarfissuaq ilinniartunut tapersersuinerulersinnaavoq imaluunniit ilinniagaq sivitsorlugu.
- Takornartat oqaasii atorlugit ilinniarneq unammillernartarsinnaavoq, atuarniarneq paasinninniarnerlu sivisunerusinnaasarmat. Suliassat taamaasillutik oqimaannerulersarput.
- Aaqqiissutaasinnaavoq sivisunerusumik ilinniarsinnaaneq ammaanneqarnissaa, taamaasilluni ilinniartut oqilisaanneqarsinnaammata, allanilli aamma ilinniarfissuarmiit aaqqiisoqarsinnaassaaq naammassinnittartut amerlanerulersikkumallugit, Suinni Johansen isumaqarpoq.