Ilitsersuisoq: Filmip takuteqqaarneqarnissaa pissanganarpoq

Filmiliornermi ilitsersuisartoq Lasse Lau ulapittorujussuuvoq. New Yorkimi najugaqarfimminit Københavnimut pingasunngormat tikippoq. Tikereernermi kingorna filmiliaa 'Lykkelænder' Odensemi takuteqqaarneqarpoq. Ullumi sisamanngornermi Kalaallit Nunaannukarpoq.

Filmiliaami kulturikkummi illorsuarmi Katuami unnugu takuteqqaarneqassaaq.

- Takuteqqaarnweqarnissaa pissanngatigaara, tassami filmip Danmarkimi oqallisigineqarnera Kalaallit Nunaanni allaanerussasoq naatsorsuutigaara.

Kalaallit Nunaata Danmarkillu ataqatigiinnerat filmimi takutinneqarpoq, Danmarkip Kalaallit Nunaat aamma kalaallit qanoq isiginerai takutinniarneqarluni. Lasse Lauip Kalaallit Nunaat pillugu takorluugai aamma sammineqarput.

Filmi filmfestivalimi Copenhagen DOX-imi ilassilluarneqarpoq, nunani avannarlerni filmini pitsaanerpaatut nersornaaserneqarluni.

- Pissangalaartuaannartuuvunga. Pissangaleraangama quiartoqattaartuartarpunga, filmilu takuteqqaarneqalerpat assinganik iliussasunga naatsorsuutigaara, Lasse Lau qungujulluni oqarpoq.

- Filmip ilusaa nuannaarutigaara, toqqaannartumimmi oqariartuuteqarpoq. Inununnut uannullu tunngassuteqarpoq.

Vivi Nielsen aamma Nukâka Coster-Waldau inuttaaqataapput. Filmip ineriartornissaa anguniarlugu tapertaalluarsimapput. Lasse Lauip filmiliani nuannarigaluarlugu kalaallinut takutinnissaa pissangagilaarpaa.

- Kalaallit kiisisa pillugit una filmiliaanngilaq, tassami danskit pillugit aamma takussutissiineruvoq. Kalaallit Nunaat pillugu sanngiiffeqarpunga, ilisimanngisaqarlungalu.

Filmi filmisulli allatut suliaanngilaq.

- Isiginnaartussat silappaarissuussapput, filmip oqariartuutaa malillugu nammineq oqaluttuassaminnik eqqaasaqarsinnaassagunarput. Kalaallinik filmi nuannaralugu oqartunik oqaloqateqarsimavunga - filmimi nassuiaasoqarpallaannginnera iluaralugu oqarput.

Filmi aalajangersimasumik oqariartuuteqanngilaq, taamaattorli eqqarsarnartoqarluni.

- Misigisat oqitsuinnaanngitsut takutinniarsaraakka. Oqaatsit pillugit oqallinnermi tamanna takuneqarsinnaavoq, tamatumanimi nunasiaataasimaneq pissutaavoq. Aaqqiissutaasussat oqitsuunngillat.

Filmi Nuummi aamma Aasianni ilinniarnertuunngornianut kiisalu Ilisimatusarfimmi ilinniartunut aamma takutinneqassaaq. Inuusuttut filmi pillugu oqallinnissaat Lasse Lauip qilanaaraa, inuusuttut namminiilivinnissamut qanoq isummersuuteqarnersut tusarusullugu.

- Danmarkip siunissaa, qanoq isikkoqassanersoq aamma Kalaallit Nunaannut qanoq attuumassuteqassanersoq oqallinnermi paaserusuppakka. Oqallinneq soqutiginassaqaaq.

Lasse Lau aamma filmimi peqataasut Vivi Nielsen kiisalu Angunnguaq Larsen filmip takuteqqaarneqarneranut atatillugu apersorneqarsinnaassapput.

Katuami nalunaaqutaq 21.00 takuteqqaarneqassaaq.