efterlysning
Ilissi aneerasaartarfissi aamma ulorianarpa?
Nuummi aneerasaartarfimmit nakkartoqarnerata kingunerisaanik Sermitsiaq.AG-p atuartartuminit aneerasaartarfinnit assit pissarsiarerusuppai
Nukappiarannguup ataatsimik ukiullip Nuummi Tuapannguani inissiarsuarmi 6. salimit tallimanngornermi nakkarnera uissuummissutaaqaaq.
Ataasinngornermi inissiaatileqatigiiffik Illuut A/S aamma Permagreen A/S, Tuapannguani inissiarsuarnik sanaartortut inissiani assingusuni najullinnut aneerasaartarfinnik atuinissaat mianersoqqussutigaat, aamma aneerasaartarfiit tamaasa juulip aallaqqaataa nallertinnagu misissorneqarnissaat naatsorsuutigineqassapput.
Sermitsiaq.AG-mit ilisimaneqarpoq Tuapannguani tårnini najugallit taamatullu Qinngutsinni inissiani assingusuni najugallit aneerasaartarfiit ulorianartut pillugit ilisimatinneqartut.
Nuummi inissiat allat qanoq ippat, imaluunniit sineriammi? Ilissi aneerasaartarfissi ulorianarpa? Nakkarluni ajunaartunik allanik tusarsimavit? Assimik nassitsigut aneerasaartarfivillu qanoq ulorianartiginera eqqartorlugu. Illit ulorianartuusorisanni ungasissutsit uuttortarsinnaavatit.
suulut@sermitsiaq.ag allaffigiuk