appaarutilernera

Ilisimatuut: Taamaattumik appat nungulerput

Ukiut tamaasa unioqqutitsisumik appanniartoqartoqartarpoq sumiiffiillu ilaanni mannissartoqartarluni

Appat ikiliartornerannut unioqqutitsilluni appanniartarneq pisooqataasorineqarpoq

Unioqqutitsilluni appanniarnerni upernaakkullu appaniarnermi appaqassuseq innarlerneqangaatsiartarpoq appat ilaat piaqqisartut pisaasaramik. Appaqarfiit ilaat ukiut qulit iluanni appaarutiinnariaapput.

Atuaruk: Appat eqqissisitaalluinnarnissaat biologit inassutigaat

Nunatsinni appaqassuseq ulorianartorsiortoq, Pinngortitaleriffik sisamanngornermi nalunaarpoq taamaammat inassutigaat appat ukiuni qulini eqqissisitaalluinnarnissaat. Appat ikileriarujussuarnerannut pissutaasut arlaqarsorineqarput.

- Unioqqutitsilluni appanniartoqartarpoq. Tamanna pisanik nalunaarsukkani takusinnaavarput. Upernaakkut appanniarnermi aamma appat piaqqisartut eqqorneqartarput. Kisianni sumiiffiit ilaanni aamma mannissartoqartarpoq, appat pillugit ilisimatuut inassutaannik suliarinnittut Flemming Merkel aamma Aili Labansen oqarput.

Taakku inassutigaat unioqqutitsilluni apparniartarneq killilersimaarniarlugu immikkut ittumik iliuuseqartoqartariaqartoq aammalu ukiuni qulini appat eqqissisitaalluinnassasut.

- 1990-kkunniit Upernaviup eqqaani appaqarfiit sisamat appaarussimapput. Arpaqarfiit appaaruttut appaqaleqqinnerannik siumuisoqarsimanngisaannarpoq. Appaarukkaangamik tassa qaqugorsuarmut atasussamik appaaruttarput, Flemming Merkel aamma Aili Labansen oqarput.

Silap allanngornera pisooqataavoq

Appat ikileriarujussuarnerat aamma silaannaap allanngorneranik pissuteqarsinnaapput. Norskit ilisimatuut aarleqqutigaat Atlantikup avannaani immap sarfaasa allanngornerat aamma pisooqataasoq.

- Appat toqusartut amerlisimapput. Imaassinnaavoq nerisaqarniarnermikkut aamma eqqorneqarnertik ikiliartussutigigaat, Flemming Merkel aamma Aili Labansen oqarput.

Arpat Svalbardimi aamma Islandimi ikilisimasut aamma paasineqarpoq.

Powered by Labrador CMS