NUNAMED
Ilisimatuut peqqinnissamillu sulisut Nuummi katersuupput
Peqqinneq pillugu ataatsimeersuarneq NUNA MED ukioq manna aatsaat taama peqataasoqartigaaq
Ilisimatuut, peqqinnissamik sulisut Nunatsinnilu peqqinnermik soqutiginnittut allat Nuummi Hotel Hans Egedemi katersuutileruttorput. Tassani peqqinneq pillugu ataatsimeersuarneq NUNA MED ingerlanneqassaaq, inunniit 300-t sinnilinnit nunanit 11-neersunit peqataaffigineqarluni.
Ataatsimeersuarnermi sammisassat amerlasuujupput soorlu nappaatit tunillattartut, tuberkulose, genetik, retspsykiatri aamma telepsykiatri, nappaatit anigorneqarsinnaanngitsut passunneqarnerat, atuartut peqqissusaat, imminut toqunnermi qimataasut, avatangiisit sulinermilu nakorsaatit, peqqinnermi inuttut atukkat assigiinngissutaat allarpassuillu.
– Iluarisimaaqaarput NUNA MED ataatsimeersuarninngortissimagatsigu pisartutut utertartutut, tamatumani nunatsinni nakorsaatitigut ilisimatusarnermi angusat saqqummiunneqararlutik Kalaallillu Nunaanni ilisimatusarnikkut apeqqutit sammineqartut suut tamaasa akimorlugit oqallisigitilerlugit. Anguniagaraarput Kalaallit Nunaanni peqqissutsikkut ilisimatusarnermi suleqatigiinnerup siuarsarnissaa, ataatsimeersuarnermi pingaarutillit ilaat Gert Mulvad oqarpoq.
Ataatsimeersuarneq arfininngormat ammarneqarpoq peqqissutsimut Naalakkersuisumit Steen Lyngemit, Atassut, ataasinngorpallu naassalluni.