uddannelse
Ilisimatuunngorniat atuartinneqarput
Ph.-d.-mi ilisimatuunngorniat nunanit assigiinngitsuneersut 50-it angullugit amerlassusillit atuartinneqarput, ilaatigut silap pissusiata allanngoriartornerata Nunatsinni avatangiisinut kinguneqaatai paasisaqarfigalugit
Hotel Hans Egede aamma Pinngortitaleriffik ulluni makkunani Ph.-d.-mi ilisimatuunngornianik atuartitsipput, tamatumani sammineqarlutik silap pissusiata allanngoriartornerata avatangiisinut, inunnut naggataatigullu peqqissutsimut kinguneqaatai. Taamatut paasissutissiivoq Pinngortitaleriffik.
Ilinniagaqartut gruppinut marlunnut avissimapput. Aappaa pinngortitamik ilisimatusarfiulluni, aappaalu inuiaqatigiinnut ilisimatusarfiulluni, tassaasut nakorsatut ilisimatusartut, inunnut kinguneqaatinik taaneqartunik samminnittut. Gruppi siulleq ph.-d.-mi ilisimatusartut Pinngortitaleriffimmi atuarput kingulliillu Hotel Hans Egedemi atuarlutik.
Pinngortitamik ilisimatusartut ilisimatuutut suliniutip Nordfrost-imik taaneqartup ilagivaa, taannalu aamma Defrost-ip ataani suliniutaavoq, Defrost nunat avannarliit ilisimatusarnikkut suliniutigaat, silap pissusiata allanngoriartornerata nunarsuup sermeqarfiinut aputeqarfiinullu sunniutaanik samminnittoq.
Hotel Hans Egedemi atuartut suliniussuit kinguneqaatigisinnaasaat inuillu peqqissusaannut, sumiiffimmi inuiaqatigiit atugarisaannut kiisalu inuiaqatigiinnut avatangiisinullu kinguneqaatigisinnaasaannut pingaaruteqassutsit sammillugit.
Hotel Hans Egedemi ph.-d.-mi ilisimatsuarneq ukioq mann aaqqissuussamut NUNA-MED, septembarip 7-anniit 9-annut ingerlanneqartumut, attuumassuteqarpoq.