akerleriiffiusinnaasoq

Ilisimatusartoq: Kinamiut 'navianartorsiortitsinerat' ingasaassineruvoq

Danskit politikeriisa Kinamiut Kalaallit Nunaanni aningaasaliisarneri navianartorsiortitsisutut paasigaangatigit, isumannaatsuunissamut naliliinermut tunnganani naalagaaffiup iluani pissutsinut politikki,ut tunnganerusarpoq. Ilisimatusartoq Kevin Foley atuakkami nutaami taama tunngavilersuivoq

Kinesisk flag

Danskit politikeriisa kinamiut kalaallit aatsitassarsiorfiinut aningaasaliinerinik oqaluuserinnikkaangamik, navianartorsiortitsinermut naliliinermut tunngasortaa annikitsuararsuusarpoq. Siullermik danskit naalagaaffiup iluani pissutsinut politikkiannut tunnganeruvoq. Kevin Foleyip tamanna inerniliuppaa, taanna Cornell Universitymi USA-mi PhD-mik ilinniartuuvoq, Kina aamma Aasia immikkut sammisaralugu.

Kinamiut aningaasaliinerisa naalagaaffiup isumannaatsuunissaanik politikkimut tunngasortaanut apeqqutit misissuiffigisimavai, atuakkamilu ‘Greenland and the International Politics of a Changing Arctic’-imi kapitalimik ataatsimik allaaserinneqataasimalluni.

Suliniutinut angisuunut inatsimmik oqalliseqarneq
Kevin Foleyp piffissaq 2012-mit 2014-imut misissuiffigaa, tassani Isuani suliniummut angisuumut oqallinneq annerpaaffimminiippoq. Suliniutip taassumarpiaq toqqarneqarneranut pissutaavoq, Kalaallit Nunaata kinamiunik annertuumik aningaasaliitinnissaanut qaninnerpaammat.

Danskit politikerii tassani kinamiut aningaasaliinissaanut annertuumik ernumassuteqarnerat, Foley naapertorlugu partiit talerperliit naalakkersuisuunertik annaaqqammersimanerat isiginiarneqassasoq, taamaattumillu malunnaateqarniarnissaminnut pisariaqartitsisimallutik.

Suliniutinut angisuunut inatsit aamma 'ilisarisimanngisanut' ernumaneq
Suliniutinut angisuunut inatsit aamma kinamiut aatsitassarsiorfinni sulisorpassuit 'partiit talerperliit naalakkersuisut socialdemokratiskinik siuttoqartut nunanut allanut politikkimut, nunasisunut aamma sulisut pisinnaatitaaffiinut tunngatillugu sallaatsutut saqqummersinnissaannut periarfissaqartilerpaat.'

Aamma atuaruk: Nunarput nunanut allanut politikkikkut Kinami nukersorpoq

Kina Issittumik periusissiatut soqutigisaqannginneranik tunngavilersuinngilaq, kisianni tamatuma danskit oqallinnerat aallartinngikkaa isumaqaaannarpoq. Taannami naapertorlugu kinamiut tungaannit periusissiamik imaluunniit sakkutooqarnikkut navianartorsiortitsisoqanngilaq.

- Politikkikkut oqaluttuatut, suliniutinut angisuunut inatsimmut isornartorsiornerup, sulisoqarnermut tunngasunut apeqqut, naalagaaffiup isumannaatsuunera, inuit pisinnaatitaaffii aamma demokratii nunamik pingaatsitserpalaartumik allaneersunut ersinermik aamma nunasiortortunut nangaassuteqarnermik, tamatuma saniatigut Socialdemokraatit naalagaaffinnut allanut pingaartitanik tunisisutut isikkoqartinneqarnerat sunniuteqarluarpoq, Kevin Foley allappoq.

Akerleriinnissat nutaat utaqqipput
Venstrep naalakkersuisuuneranni Naalakkersuisut kinamiunik aningaasaliisussarsiorsimagaluarpata, Venstrep tungaanit isornartorsiortoqannginnissaa taassuma tunngavilersuiffigaa.

Kevin Foleyp maanna Kalaallit Nunaanni kinamiut annikitsuinnarmik suliaqartut oqaatigaa, assersuutigalugu Shenghe Kuannersuarni suliniummut aktiasinikuuvoq. Naalakkersuisut kinamiut aningaasaliinissaannik ilungersuuteqarnerat aamma siunissamik politikkikkut Danmarkimut akerleriisitsinermik pilersitsissasut oqaatigaa, tassani nunanut allanut politikkip naalagaaffeqatigiinnermut tunngasuunera unnersuunneqarsinnaalluni.

- Danmarkimi politikkikkut peqataasunut Kalaallit Nunaata namminersortuunerata annertussusaanik unammillernartoqartitsisumik kissaateqarsinnaasunut aningaasaqarnermut ineriartornermut apeqqutit assigiinngitsut eqqarsaatigalugit isumannaatsuunissamut politikkimik taakkartuinissamut tamanna ammaassivoq. Kalaallit Nunaat unammilligassanut taamaattunut sunnertiasuuvoq, nunap inissisimanera pissutigalugu politikkikkut pingaaruteqarnera pissutaalluni, allaaserisami tamanna oqaatigineqarpoq.

Talerperlernik naalakkersuisoqarnissaq neriuutigineqartariaqartoq
Naalakkersuisut Danmarkimi talerperliit naalakkersuisuunissaannik neriuuteqartariaqartut ilisimatusartoq isumaqarpoq, tamatumami partiit talerperliit apeqqummi malunnaateqarniarnerannut annikillisinniassammassuk.

- Talerperliit naalakkersuisoqatigiinnik pilersitsippata, nunanit allanit Kalaallit Nunaannut aningaasaliinerit politikkikkut akerleriisitsinerannik kinguneqarnerat ilimanannginneruvoq, tamannalu 2015-imi qinersinermit taamatut inissinnikuuvoq.

Powered by Labrador CMS