KL

DK

Ilisimatusartartut: Takornariaqarnermik suliassaqarfiit unammilligassaat

Kalaallit Nunaanni takornariaqarnerup aqunneqarnera tamakkiisumik nutarteriffigineqarluni pitsanngorsartariaqarpoq, inuiaqatigiit siunissami tikitaminnik mianerinnillutik takornariartartut amerliartuinnartut annertunerpaamik pissarsiffigissappatigit.

Redaktionen

Ilisimatusarneq

Silap pissusiata allanngornerata kinguneri ukiorpaalunngulersuni tusartariileqaagut, kisiannili Kalaallit Nunaanni qanoq iliorluta allanngoriartuutinut naleqqussarsinnaanerput eqqartungaassanagu.
Issittumi Siunnersuisooqatigiit ilisimatusartartunut Canadameersunut, Kalaallit Nunaanneersunut Danmarkiminngaanneersunullu nunarsuup issittortaata immikkoortuinut Kalaallit Nunaata kitaani Canadallu kangiani silap pissusiata allanngorneranut naleqqussarniarluni iliuuserineqarsinnaasunik innersuussuteqaqqullugit suliakkiuteqarsimapput.

Innersuussutit

Kalaallit Nunaanut tunngatillugu ilisimatusartartut suliassaqarfinni assigiinngitsuneersunik suleqateqarlutik paasissutissarpassuarnik katersuipput, soorlu atortulersuutinut, ilinniartitaanernut, aatsitassanut allanullu tunngassuteqartut paasissutissat katersorneqarlutik. Taamaaliortoqarpoq ukiuni 2013-imiit 2016-ip tungaanut, maannalu suliat inernerannit innersuussutit piareerneqarput. Inernerit innersuussutillu Nuummi sapaatip akunnerata tulliani saqqummiussorneqassapput, ataatsimiinneq Pinngortitaleriffimmi pissaaq marlunngorneq 11. septembarimiit 13. septembari ilanngullugu ingerlanneqassalluni.

Allaaserinnittoq

Pinngortitaleriffimmi ataatsimiinnissaq sioqqullugu ilisimatusartartut naluaarusiami ”Adaptation Actions for a Changing Arctic”-imi (Issittumi allanngoriartortumi naleqqussarnissamut
iliuusissat) suliaqaqataasimasut allaaserisaaqqanik ataatsimiinnissamut qilanaartuutitut Sermitsiaq.AG-mi ilanngussaqartassapput. Ullumikkut allaaserisami sammineqartut nalunaarusiap pineqartup kapitalitaasa ilaat takornariartitsisarnernut tunngassuteqartumit assersuutissaavoq.

Matumani sammisami allaaserinnittuuvoq Aalborgip Universitetiani lektori Lill Rastad Bjørst.

Kalaallit Nunaata ukiuni kingullernik 30-ni takornariaqarnikkut ineriartitsisimanini aammalu Issittup sutigut tamatigut silap pissusiata allanngornerata kingunerisaanik tikikkuminarneruleriartornera peqqutaalluni piffissami aggersumi iluatsimaariartuutigilissavai. Nunavumi nuna tamakkerlugu takornariaqarnikkut periusissatut pilersaarutip piviusunngortinniarneqarnera aatsaat aallarnisarneqaleruttorpoq, kisiannili ataqatigiissaarilluarnikkut Issittumi takornariaqarnikkut siuariartorneq iluatsitsissutiginiarsinnaassallugu. Issittoqarfiusuni pingaartumik Kalaallit Nunaanni Nunavumilu takornariaqarnikkut ineriartortitsinerni pileriartortut nutaat aammalu silap pissusiata allanngorneranit peqquteqartumik kaamisaasuusut misissuinerit kingulliit takutippaat.

Inernerit takutippaat takornariaqarnermut tunngatillugu ilisimasat piginnaasallu annertusartariaqarnerat, atortulersuutitigut aningaasaliinerit, sumiiffimmi innuttaasunik pikkorissaanerit aammalu suliffeqarfinnik pilersitsisinnaasut uummarsaaviginerisigut. Piujuarsiinnaasumik attanneqarsinnaasumillu takornariaqarnikkut siuariartornermik pilersitsisoqassappat sumiiffigisami innuttaasut, kommunit aammalu nunami naalakkersuinermik suliaqartut suleqatigineqarluinnarnissaat pisariaqarluinnarpoq.

Nunap immikkoortuini sinersorlutik umiarsuarsuarnik takornariartartut amerliartorput, kisiannili sikunik alapernaarsuinernit pitsaasunit ikorfartorneqannginnerat akornuterujussuuvoq aammalu inatsisitigut aqutsinerit pitsaasut amigaatiginarput. Umiarsuarsuarnik Issittoqarfinni takornariartartut amerlatsikkiartortut iluaqutiginiarneqassappata nunat issittumiittut suleqatigiinnerusariaqarput takornariaqarnernullu aningaasaliissutigisartagaat amerlineqartariaqartariaqarnerat innersuussutiginarpoq.

Nalunaarusiap imarisai pillugit Nuummi innuttaasunut Pinngortitaleriffimi marlunngorneq 11. september
2018 nal. 19-21 ataatsimiititsisoqassaaq.

Læs hele sagen:

silap pissusaa avatangiisillu inuiagatigiit
Powered by Labrador CMS