Klimastation
Ilisimatusarfissaq toqqavilerneqarpoq
Ilisimatusarfimmik nutaamik sananissamut sanaartornermi atortussat apuunniarnerat ajornakusoorsimavoq
Kunngissap Nunatta avannarpiaani Station Nordimut tikeraarnerata kingorna sapaatit akunneri pingasut qaangiutiinnartut Aarhus Universitetip namminersorlutillu oqartussat ilisimatusarfissaannut sanaartornermi atortussat tikiunneqarput.
Aamma atuaruk: Kunngissaq qimusserpoq
– Atortussat taama sukkatigisumik apuunniarnissaat tamaviaarnarsimavoq, iluatsitsillutalu USA-mi ilisimatusarnermut siunnersuisoqatigiinnit ikiorneqarsimavugut, seniorrådgiver Morten Rasch, Aarhus Universitetimeersoq ilisimatusarfittaassamut atortussanik tikiussinissamut akisussaasoq oqarpoq. Atortussat Hamborg, New York aamma amerikarmiut Thulemi sakkutooqarfiat aqqusaarlugit assartorneqarput, timmisartumillu Herkules-imik (C-130) Station Nordimut apuunneqarlutik.
Station Nordimi nuna assatassarujussuusimavoq toqqavissaata sananissaanut. Nuna 200.000 kubikmeteri peerneqartariaqarpoq Issittumi ilisimatusarfiit atortorissaaruteqarnersaasa ilaat, Qalasersuarmit 800 km-iinnarnik ungasitsigisumiittup, naammaginartumik toqqaveqarnissaanut.
Taamatut allappoq Aarhus Universitet.
Illu uuttortaasarfeerannguaq ilisimatuut manna tikillugu atorsimasaat nutaamik sananikkut angisoorujussuanngussaaq. Villum Resarch Station 600 kvadratmeterimik angitigisumik unnuisaqarffeqassaaq nutaalianik atortulinnik aammalu biologiskinik, geologiskinik kemiskinillu misissuinissanut laboratoriaqassalluni nutaaliaanerpaanik atortulinnik. Snescooterit qamutillu larvefodillit aammalu timmisartuaqqat inuttaqanngitsut, silaannaap katitigaaneranik misissuisinnaasut aammalu silaannarmit uumasunik nunallu qanoq issusianik misissuinermi atorneqarsinnaasut.
– Issittumi silap pissusiata allanngoriartupiloornerata sermimut silaannarmullu aammalu nunami imaanilu uumassuseqarnerup sunnerutaat ima sukkatigaat siusinnerusukkut takusimanatigu. Taamaattumik aallartinnissaq nukingernarpoq. Sanaartugassaq ajornakusoortuuvoq, naatsorsuutigaarali ilisimatusarfittaassaaq aappaagu ukiup naalernerani atulersinnaassasoq, suliniummi pisortaq, ilisimatooq Henrik Skov oqarpoq.