Nuuk
Ilisimatusarfimmi atualertut ima amerlatigipput
Ilisimatusarfimmi atualertut marlunngormat tikilluaqquneqarput
Nuummi Ilisimatusarfimmi atualertut 177-it ilinniarfiup pisortaanit Tine Parsimit marlunngormat tikilluaqquneqarput.
Ilisimatusarfik ukioq manna GUX-ini ilinniarnertuunngortut 58 procentiisa missaannik ilinniartoqalissaaq. Ilisimatusarfimmi ilinniagaqalernissamik soqutiginninneq ukiuni kingullerni annertuneruleriartorpoq, ilinniartullu amerliartuinnarnerat rektor Tine Pars’ip nuannaarutigaa.
Piumasaqaatit
- Ilinniakkamik naammassinninniaraanni nammineersinnaaneq, inerisimaneq tunniutiinnajuissuserlu pisariaqarput, Tine Pars oqalugiarnermini ilaatigut oqarpoq.
Ilinniartut nutaat Ilisimatusarfimmiit annertuumik piumaffigineqarneq misigissavaat. Ilinniartut oqaatsitigut pikkorissuusariaqarput atuagassallu annertuut sukkasuumik sukumiisumillu atuarsinnaassallugit, isumaliutigisinnaassallugit nutaanillu namminneq pilersitaminnik ataqatigiissitsisinnaassallutik.
Tamanilli pingaarnerpaavoq tunniutiinnajuitsuunissaq – aamma artornartorsiorfinni, rektor oqarpoq.
Ilinniarfik nutaaq
Ukioq mannattaaq inuussutissarsiornermi aningaasaqarneq pillugu Ilisimatusarfimmi ilinniakkamut nutaamut ilinniartut nutaat 19-it rektorip tikilluaqqusussaavai.
Ilinniartitaaneq taanna pingaartumik inuussutissarsiutini namminersortuni suliffissanik periarfissiisussaavoq. Ilinniakkaminnik naammassinnittut soorlu assersuutigalugu naatsorsuuserinermut aningaasaqarnermillu aqutsinermut tunngasuni, aningaasaliinernut tunisivissarsiornermullu tunngasuni suliffittaarsinnaapput.