Ilisimatusarfimmi aallartittut ima amerlatigaat
Ilisimatusarfimmi ilinniartunngortut nutaat marlunngormat tikilluaqquneqarput
Ilinniagaqartut katillugit 177-it, Ilisimatusarfimmi ilinnniagaqarfinnut qulinut agguataarsimasut, ukioq manna ilinniagarnertik aallartippaat, marlunngormallu rektorimit Tine Parsimit tikilluaqquneqarput.
Ukioq manna GUX-imit soraarummeertut 58 procentiisa missaat Ilisimatusarfimmi tiguneqarsimapput. Ilisimatusarfimmi ilinniagaqarnissamik soqutiginninneq ukiuni kingullerni annertusiartorsimavoq, tamannalu rektor Tine Parsip nuannaarutigaa.
Ilinniagaqartunut piumasaqaatit
– Ilinniagaqarneq ingerlatissagaanni tamatumunnga pisariaqarput namminersorneq, inerisimaneq ilungersornerlu, Tine Pars ippassaq marlunngornermi tikilluaqqusilluni oqalugiarnermini oqarpoq.
Ilinniagaqartut nutaat universitetimi amerlasuunik piumaffigineqartarput. Ilinniagaqartut oqaatsitigut pikkorissuussapput ilinniagassat annertuut sukkasuumik peqqissaartumillu atuarnissaat sungiutissagunikku, ataqatigiinnerit nutaat eqqarsaatersorfigalugit takullugillu, namminerlu pilersillugit.
– Pingaarnersaavorli tunnniutiinnannginnissaq - aamma artornartoqaleraangat, Ilisimatusarfiup rektoria ilaatigut oqarpoq.
Ilinniagaqarfik nutaaq
Ukioq manna rektorip Ilisimatusarfimmi ilinniagaqarfimmut nutaamut, erhvervsøkonomi-mut, ilinniarut 19-it tikilluaqquvai. Ilinniagaarfik nutaaq pingaartumik inuussutissarsiortuni namminersortuni atorfinitsitsisinnaapput.
Ilinniagaqartut naammassigunik assersuutigalugu naatsorsuusiortutut aningaasanillu aqutsisutut, aningaasaliinermik ussassaarinermillu atorfinissinnaapput.