Ilisimatusarfik nutaamik pisortartaarpoq

Ilisimatusarfimmi siulersuisut juunip 24-ani ataatsimiinnerminni aalajangerput Mette Barslund cand. negot.-itut ilinniarsimasoq universitetimi pisortanngortinniarlugu. Estrid Janussen aalajangerpoq Danmarkimut nuunniarluni kingoraassavaa.

- Mette Barslund Nuummi Niuernermik Ilinniarfimmi sivisuumik sulisimavoq.
1996-imi ilinniartitsisutut aallartippoq, 2004-miillu 2012-ip tungaanut inspektøritut pisortallu tullersortaatut atorfeqarsimalluni. 2012-imi Niuernermik Ilinniarfimmi sulisut 40-t akisussaaffigalugit forstanderinngorpoq. Århus ledelsesakademimi pisortassatut ilinniarsimavoq, namminerlu pisortassatut ilinniarfinni assigiinngitsuni ilinniartitsisarsimalluni, HD (O) Ilisimatusarfimmit ingerlanneqartoq ilanngullugu, Ilisimatusarfik tusagassiutinut nalunaaruteqarpoq.

Mettep toqqarneqarneranut pissutaapput nunatsinni ilinniartitaanermut tunngasutigut ilisimasaqarluarnera, allaffissornermut aqutsinermullu piginnaaneqarnera nunatsinnilu inuiaqatigiinnut ilanngutivissimanera.

- Estrid Janussenip sulilluarsimaneranut nunatsinnilu suliffeqarfimmut pingaarutilimmut annertuumik ineriartortitsisimaneranut siulersuisut qujassutissaqarput. Estrid peqqissaarluni, tatiginarluni isumaliutigilluakkamillu pissuseqarluni allaffissornikkut ineriartortitsinermik suliaqarsimavoq, universitetip alliartorneranut ikorfartuisumik.

Mette Barslund aggustip sisamaanit atorfittaamini sulilissaaq.