Ilisimatooq: Benzinamut korti pillugu akissuteqaat nalinginnaanngilaq
Benzinamut kortip atorneqarsimanera pillugu paragraf 37 naapertorlugu akissuteqaat nutaaliornerullunilu nikingasoornartuusoq inuiaqatigiilerinermut ilisimatooq naliliivoq
Naalakkersuisunut ilaasortap benzinamut kortimik atornerluisimanera pillugu paragraf 37 naapertorlugu Vittus Qujaukitsup apeqqutinik pingasunik akissuteqarpoq pingasunngormat.
- Naalakkersuisut sinnerlugit apeqqutit pingasuusut tamaasa naaggaarlugit akivakka, akissuteqaammi Vittus Qujaukitsoq naatsumik allappoq. Naalakkersuisoq Doris J. Jensen akissuteqaammi aamma ilanngussaqarnissani noqqaassuteqarsimasoq atuarneqarsinnaavoq.
Akissuteqaat
- Taamatut akissuteqaateqarneq nutaaliorneruvoq, tassani eqqartorneqartoq apeqqutinut akissuteqartinnissaa peqataatinneqarsimammat, Ilisimatusarfimmi inuiaqatigiilerinermut ilisimatooq Birger Poppel oqarpoq.
Taamattut akissuteqaateqarneq nalinginnaasuunnginnera ima nassuiaateqarpoq:
- Apeqqummut attuumassuteqartumut Naalakkersuisoq akissuteqartarpoq, Naalakkersuisut sinnerlugit apeqqutigineqartunut akissuteqartarluni.
- Akissuteqalinnginnermi paasissutissat katersorneqartarput, akissuteqaammi eqqumiiginartuuvoq Naalakkersuisunut ilaasortaq apeqqummi eqqartorneqartoq akissuteqartinneqarsimammat.
Vittus akissuteqanngitsoq
Sermitsiaq.AG Vittus Qujaukitsup allattaanut apeqqummik ima apeqquteqaateqarpoq:
- Doris J. Jensenip benzinamut kortiata atornerlunneqarsimanera sooq aningaasaqarnermut naalakkersuisoq nalunaajaammik suliaqarsimanngila?
Sermitsiaq.AG aningaasaqarnermut naalakkersuisumit akissuteqaammik suli pissarsinngilaq.