Ilisimatooq: Atuartuni minnerni kalaallisut atuartitsineq salliutinneqarli
Ilinniartitsisut pikkorinnerpaat atuartunut minnernut kalaallisut ilinniartitsissapput, Naja Blytmann Trondhjem oqarpoq
Naja Blytmann Trondhjem ilitsoqqussararuligit oqaatsit pillugit ilisimasat assut ernumassuteqarfigai. Taanna Københavns Universitetimi Eskimologi aamma Arktiske Studierimi lektoriuvoq, taannalu aviisimi Sermitsiami allaatigisamini ajornartorsiutit meeqqat atuarfianni, Ilinniarfissuarmi aamma Ilisimatusarfimmiinnerarpai.
- Meeqqat atuarfimmi aallartinnerminnit kalaallisut ilikkarluarnissaat aalajangiisuulluinnarpoq, Naja Blytmann Trondhjem, Sermitsiaq.AG-mut oqarpoq.
Ilinniartitsisut kalaallisut atuartitsisut angajullernik atuartitsisarput
Ataatsimut isigalugu ilinniartitsisut kalaallisut atuartitsisut amigaataasut isumaqarpoq, tamannalu taassuma oqarnera naapertorlugu meeqqat atuarfiini pitsaanngitsumik tulleriaarinermik kinguneqartarpoq.
- Ilinniarfissuarmi ilinniartitsisunik oqaloqateqarnikuuvunga, ilinniartitsisut kalaallisut ilinniartitsisunngorniartut atuartunut annernut atuartitsisussatut ilinniartinneqartartut oqaluttuarput. Tassanilu kingusinaareerpoq, taanna naqissusiivoq.
Taarsiullugu atuartuni minnerni kalaallisut atuartitsineq salliutinneqartariaqaraluarpoq. Kalaallillu oqaasiisa katitigaanerat taama annertutigitillugu, oqaatsit sannaanik atuartitsinerup ilaasussaaneranik isumaqarpoq.
- Oqaatsit ilitsoqqussarisat ilisimalluaraanni, taava aatsaat oqaatsit pinnguaralugit ineriartortissinnaanngortarput, Naja Blytmann Trondhjem oqarpoq.
Fagini allani atuartitsineq ajoqusertaraa
Atuartut minnerit kalaallisut aallaqqaataanit ilinniartilluarneqanngikkuni, akerlianik atuartitsinerup sinneranut ajoqusiisarput.
- Oqaatsit allat ilinniarniaraanni, ilitsoqqussaralugu oqaatsit atorsinnaasariaqartut, ilisimatuussutsikkut misissuinerit tamarmik takutippaat. Atuartitsinerup sinnerata ilarujussua qallunaatut ingerlanneqartarmat, meeqqat kalaallisut ilikkarsimanngikkunik aamma tassani malinnaasinnaassanngillat.
Namminersornerullutik Oqartussat aamma Namminersorlutik O qartussanit ilitsoqqussaralugu oqaatsit pingaassusaat naqissuserneqarnerat isummap akerlianik oqaatiginnittoqarpoq. Kisianni oqaatsit atorsinnaanerisa kisimi naammanngitsoq ilanngunneqanngitsoorpoq, oqaatsit ilisimasaqarfiginissaat aamma pisariaqarpoq, tassanilu angusassamik toraagaqarluni atuartitsinermik pisariaqartitsisoqarpoq.
- Namminersornerulerneq aamma Namminersorneq anguneqarmat, kalaallit oqaasii inuiattut oqaaserineqarnissaat pingaartinneqartorujussuuvoq, oqaatsillu inissisimanerannik inatsimmik atuutsisoqalerpoq, kisianni oqaatsit paaralugillu ineriartortinnissaat maluginiarneqanngitsoorpoq, taanna allaatigisamini allappoq.
Naja Blytmann Trondhjemip aviisimi allaatigisaa Sermitsiami saqqummertumi kingullermi atuarsinnaavat. Aviisi elektroniskiusoq uani ataani linki tooriarlugu pisiarisinnaavat: