qitornavissiartaarneq
Ilisimatooq: Qitornavissiat angajoqqaatik ilisimasariaqarpaat
Merete Laubjergip qitornavissiartaartarneq ilisimatusarfigisimavaa – qularutissaqanngilarlu. Qitornavissiat ilaqutavitik ilisimasariaqarpaat.
Merete Laubjerg ukiut 22-t matuma siornatigut Burkina Fasomit niviarsiaqqamik qitornavissiartaarpoq. Merete nammineq nunami tassani afrikap kitaaniittumi ukiuni marlunni najugaqarsimavoq ineriartortitsinermik suliaqarluni.
AG aviisi allappoq.
Niviarsiaqqap nammineq ilaqutaasa saaffigisimavaat aperalugulu niviarsiaraq tigorusunneraa. Niviarsiaqqap arnaa innarluuteqarsimavoq meeraalluni meningitisimik nappaateqarsimagami, taamaattumik ilaqutariit namminneq meeraq isumagisinnaanngilaat.
Akuerineqartoq
Meretep niviarsiaraq qitornavissiartaariniarlugu qinnuteqarpoq akuerineqarlunilu, sulilu ukioq ataaseq Burkina Fasomeereerluni panivissiani ilagalugu Danmarkimut uterpoq, panialu meeraanermi annersaa Danmarkimi najugaqarpoq.
Uanga panigalu ilaqutai tamatigut attaveqarfigiuarsimavagut. Allamik takorluugaqarsinnaanngilanga. Afrikap kulturiani meeqqat iperaannarneqarneq ajorput. Taamaasilluni kalaallit kulturiannut eqqaanartorujussuuvoq, Merete Laubjerg oqarpoq.
Tarnikkut nappaateqalernissamut qaninnerusut
Merete Laubjerg peqqissaasutut ilinniagaqarsimavoq, ilinniagaqarninilu tamamanna ilinniagartuutut inuit peqqissusaannik ilisimatusarnermik nangissimallugu. 2008-mi Danmarkimi qitornavissiat tarnikkullu nappaatit ataqatigiinnerat pillugu annertunerusumik misissuisimavoq. Misissuinerup, tamatumani ilaatigut Danmarkimi qitornavissiat nunanit allaneersut 6000-t misissuiffigineqarlutik, takutippaa meeqqat qitornavissiarineqarsimasut meeqqanit qitornavissiaanngitsunit marloriaat sinnerlugu tarnikkut nappaateqarnissaminnut ulorianartorsiortartut.
Ilimanarpoq qitornavissiartaarineqarneq namminermini ajornartorsiutinut pissutaasoq. Tunngavissaqanngilaq meeqqat Danmarkimut tikinnginnerminni tarnikkut nappaateqarsimanissaannut Merete Laubjerg nassuiaavoq.
Tupaallaannartoq
Meretep paasissutissat misissugassani Danmarks Statistikimit tigugamigit ilimaginngilluinnakkaminik kalaallinik qitornavissiartaarineqarsimasunik paasissutissat ilanngullugit pisimavai. Tupaallannartumik kalaallit meerartaanni qitornavissiartaarineqarneq tarnikkullu nappaateqarneq attuumassuteqanngillat.
Allaaserisaq AG kingullermi saqqummertumi tamakkerlugu atuaruk, taanna uani pisiarisinnaavat.