naalagaaffeqatigiinneq

Ilisimatooq: Kinaassuseq pillugu oqallinnermi inuusuttorpassuit ingerlariaqqinnikuupput

- Kinaassuseq eqqartornissaa nalileruminaatsuusarpoq procentinngorlugumi nalilerneqarsinnaanngilaq, Aarhusip Universitetiani Issittumi politikkimik ilisimatooq Michael Böss oqarpoq

Sermtsiaq.AG-mit allaaserineqartareerpoq JyllandsPostenip Inatsisartunut qinersisoqarnissaanut atatillugu inunnik isumasiuititsinerat. Danskit kalaallit aallaffissornikkut pitsanngoriarnissaat ilimaginngilaat, aamma danskit kalaallinut ikiuerusunngitsut isumasiuititsinerup takutippaa. Michael Bössip oqaatsini ilaat DR-imit kipineqarsimanerat oqaatigaa. DR-imut oqaatigisani Sermitsiaq.AG-mut itisilerpai.

- DR-imi oqaatigisara una ilanngunneqanngilaq: Kalaallit Nunaat kisimiitilerlugu inissinneqannginnissaa pingaartippara, Michael Böss nassuiaavoq.

- Aleqa Hammondip Danmarki pillugu oqaaserisai ataatsimuulersitsiniarsarinngillat. Tassani oqallinnermi kalaallit innuttaasui aamma avissaartuupput. Kalaalerpassuimmi imminnut kalaaliviusutut isigipput, aammali Danmarkimut attuumassuteqarnertik ilisimallugu. Kinaassutsimummi oqallinnermi procentilersuisoqarsinnaanngilaq. Kinaassuseq pillugu oqallinneq ajornakusoorsinnaasarpoq, qanormi annertutiginersoq uuttortarneqarsinnaanngilaq, Michael Böss oqarpoq.

Kalaallit inuusuttortaasa siulimi oqallinnerannik qatsussisut oqaatigaa. Apeqquserneqartuarpormi kalaaliuneq danskiunerlu aamma qanoq assigiinngitsiginerat.

- Kalaallit Nunaat nunasiaataasimanera pillugu oqallinneq maanga killeqartariaqarpoq. Ingerlariaqqittoqartariaqalerpoq, inuusuttullu ingerlariaqqikkusupput. Naalagaaffeqatigiinnermi suleqatigiilluartoqarnissaa kissaatigineqarnerujartorpoq.

Ajuallannerit
- Danskit uani oqallinnermi ilikkagassaqaqaat. Kalaallit Nunaata namminersorluni ingerlarusunnera ajuallaatigineqartariaqanngilaq. Kalaallit Nunaannummi danskit soqutiginninnerat annikippoq, Michael Böss oqarpoq.

- Aamma danskit oqaasii pillugit kalaallit ajuallattarnerat qaangerneqartariaqarpoq assinganik, Michael Böss tikkuaavoq.

Kalaallit danskillu oqaluttuarisaanikkut attuumassuteqaqatigiinnertik oqaluttuarisaanermilu ataqatigiinnertik ersarinnerulertariaqartoq oqarpoq.

- Pissutsit assigiinngitsut peqqutaallutik siunissami suleqatigiittuartussaavugut. Aningaasaqarneq, illersornissaq pillugu sulineq, avatangiisit, ilisimatusarnerit allarpassuillu. Annertunerusumik suleqatigiittoqartariaqalerpoq. Naligiimmik immitsinnut isigisariaqalerpugut. Tamanna qallunaat pikkoriffiginerulertariaqarpaat, Michael Böss oqarpoq.

Powered by Labrador CMS