Aalisarneq
Ilisimatooq: Avaleraasartuut inuussutissarsiornermi tupinnartuliorsinnaapput
Ilisimatusarfiup DTU-llu misissuinerat nutaaq avaleraasartuunut aningaasaliisunut atuarlugu pissanganassaqaaq
Ilisimatusarfiup aamma DTU Aqua-p nutaamik ilisimatusarnerisa takutippaat Nunatta tunuata kujataata imartaani avaleraasartoorpassuaqartoq.
Taama oqaluttuarpoq Berlingske Business.
Siorna naatsorsorneqarsimavoq tonsit millionip affaata missaanik avaleraasartooqartoq.
Imaq kissalaartoq nuannaraat
Maannali ilisimatuut arlallit Danmarkimeersut, Kalaallit Nunaanneersut, Islandimeersut Norgemeersullu, avaleraasartuut aningaasarsiornermut pingaarutillit Kalaallit Nunaata imartaanut tikinnerat siullermeersumik ilisimatuussutsikkut misissuiffigisimavaat, paasisatillu ilisimatuunut atuagassiami Ecological Applications-imi juunip 11-anni tamanut saqqummiuppaat.
– Tunumi Damarkstrædimiit Nunap Isuanut Kalaallit Nunaata aningaasarsiorfittut imartaani avaleraasartooqarfiit nalunaarsorsimavagut. Aasarisseruttorneranilu sumi tamangajavimmi avaleraasartuunik naammattoorsisarpugut. Ataatsimoortut amerlanerpaat immani kissarnerusuniipput 8,5 gradinik qaffasinnerusumik kissassusilinni, DTU Aqua-mi Ilisimatusarfimmilu seniorforsker Teunis Jansen Berlingske-mut oqarpoq.
Avaleraasartuut Nunatta imartaanuikartalinngillat silap pissusiata allanngoriartornera pissutigiinnarlugu, tamatumunngali aamma pissutaaqataavoq islandip imartaani suffisalersimagamik, tamaani imaq aamma kissarnerulersimammat.
Inuussutissarsiornermi tupinnartuliorsinnaapput
Ilisimatooq isumaqarpoq aalisagaq taanna aningaasarpassuarnik pissarsissutigilersinnaagipput, tuniniaavinni akit nikeraraluartut, piffissaq aalisarneqarfiat sivikikkaluartoq aammalu angallatit atornerat akisugaluartoq.
– Avaleraarsartuut Kalaallit Nunaanni ukiuni kingullerni pisarineqartartut amerlassusaat qiviarutsigik, avaleraasartuut Kalaallit Nunanni inuussutissarsiornermi nutaamik tupinnartuliortunngorsinnaapput, Teunis Jansen oqarpoq.