Ilisimasalik Kuannersuit pillugit: Akoorutissat avatangiisillu ataatsimoortitsinnissaat ajornakusoortoq

Kuannersuarni aatsitassarsiorfimmut avatangiisinut piumasaqaatit sukannersut kiisalu Narsami akoorutissat atorlugit suliarinnittarnissamik piumasaqaatip naammassinissaat ajornarluinnangajassaaq, aatsitassanut tunngasuni siunnersorti Ole Christiansen isumaqarpoq. Kalaallit Nunaata avataani akoorutissat atorlugit suliarinnittarfeqarneq isumatusaarnerussaaq.

Nunatsinni aatsitassarsiorfiit avatangiisinut piumasaqaatit sukangasut naammassiniarlugit sapinngisamik malmimik piiaaniarnissaq ajornakusoortoq, geologi Ole Christiansen isumaqarpoq.

Namminersorlutik Oqartussat Greenland Mineralsimut Kuannersuarni uranimik aatsitassanillu qaqutigoortunik piiaaniartumut sukannersunik naammassiuminaatsunillu piumasaqaateqartut Ole Christiansen isumaqarpoq.

Aviisi AG taama allaaserisaqarpoq.

Taanna ujarassiuujuvoq, Kommune Kujallermi aatsitassarsiornermut tunngasuni siunnersortaalluni aatsitassarsiornermillu suliaqarneq ukiorpassuarnik misilittagaqarfigalugu.

Ole Christiansen isumaqarpoq, aatsitassarsioqatigiiffinnut avatangiisinut atatillugu piumasaqaatit sukannersut tamatumalu peqatigisaanik Kalaallit Nunaanni sapinngisamik annerpaamik suliarinnittarnissamik piumasaqaatit naammassiniarnissaat ajornakusoortuusoq.

Tassami aatsitassanut oqartussat suliffissanik sapinngisamik amerlanerpaanik pissarsiniarlutik piumasaraat, Australiamiut aatsitassarsioqatigiiffiat – siornatigut GME, maanna GML – Narsami akuiaavimmik pilersitsissasoq.

- VVM-imut (avatangiisinut sunniutissat pillugit, aaqq.) missingiutit pingasut takkussimapput. VVM-imik nalunaarusiaq inaarutaasoq suli takunngilarput. Taamaattumik avatangisiinut atatillugu ajornartorsiutit GML-imit qanoq aaqqiiviginiarneqarnersut ilisimaqqisaanngilarput.

Issiaviit marluk akornannut

- Kisianni Kalaallit Nunaanni issiaviit marluk akornannut ingittartutut isikkoqarpugut. Illuatungaani oqartussat najukkami akuiaanissamik piumasaqartarput suliffissanik amerlanerpaanik pissarsiumallutik. Tamatuma peqatigisaanik avatangiisinut atatillugu sukannersorujussuarnik piumasaqaateqartarpugut. Pissutsit taakkua marluk imminnut akerleriipput taatsimoortikkuminaatsorujussuullutillu. Taamaattumik aperisoqarsinnaavoq, Kalaallit Nunaata avatangiisinut piumasaqaatit qasukkartissanerai imaluunniit akuiaavimmik pilersitsinissamik piumasaqaat qasukkartissaneraa, Ole Christiansen oqarpoq.

Allaaserisaq tamaat atuaruk, avatangiisit aamma suliffiit akornanni akunnattoorut AG-mi paasisaqarfigalugu. Uani ataani isissutissarsigit:

Powered by Labrador CMS