Skandinavia
Ilisimasalik: Illersuiniarluni suliumajunnaartoqassappat danskit silaannakkut angallannerannut eqquissaaq
Norwegianip timmisartuisa suliumajunnaarnissaannut tapersersuiniarlutik aamma ilaasortatik suliumajunnaartinniarlugit kiffartuussinermut kattuffiup kalerriutigaa
Timmisartumi aquttut suliumajunnaarnissaannut kattuffimmi ilaasortaqataasa tapersersorlugit aamma suliumajunnaassappata Danmarkimi silaannakkut angallanneq eqqorneqarujussuassassoq Sydbankimit silaannakkut angallannermut ilisimasalik Jacob Pedersen naliliivoq.
- Taamaasilluni Norwegianimut ilaasussat kisimik eqqorneqassanngillat, silaannakkut angallassineq tamaat eqqorneqarsinnaavoq, oqarpoq.
- Suliumajunnaartoqassappat silaannakkut angallassineq eqqorneqarujussuassaaq, Jacob Pedersen oqarpoq.
Kiffartuussinermut kattuffiup kalerriutigaa Norwegianimi timmisartortartut suliumajunnaarnissaannut tapersersuiniarlutik ilaasortatik suliumajunnaarsinniarlugit.
Taamatut pisoqassappat aningaasaqarnikkut eqquerujussuartoqassasoq Jacob Pedersen oqarpoq.
- Timmisartut arlaqartut angallassinissaraluatik unitsiinnartariaqassavaat suliumajunnaartoqassappat. Suliumajunnaartoqassappat Københavnip timmisartoqarfiata affaa matugallarneqartariaqalersinnaavoq, Jacob Pedersen oqarpoq.
Kiffartuussinermut kattuffik 20.000-nik ilaasortaqarpoq. Timmisartortartuinnaanngillat kisianni timmisartoqarfimmi sulisut aamma kattuffimmi ilaasortaapput.
Suliumajunnaartussanut illersuiniarlutik suliumajunnaartussat qanoq amerlatigissanersut suli ilisimaneqanngilaq, naatsorsuutigineqarporli sulisut 3.000-t missaat suliumajunnaassasut.