Siumumi siulittaasussarsiorneq
Ilisarititsineq: Kim Kielsen Siumumi saliissaaq
Siumup siulittaasortaavata politiiusimasup novembarip 28-anni qinersinissaq sioqqullugu partii katersorniassavaa
Siumut ajornartorsiortoq nutaamik aallartinnissaminut qularnanngitsumik piareerpoq.
Arfininngormat immikkut ittumik ataatsimeersuarnermi amerlanerussuteqarluartut Kim Kielsen siulittaasutut nutaatut toqqarpaat.
– Inuup taassuma politikerinik tatiginninneq pilerseqqissinnaavaa. Siornatigut ajortuliaqarsimanngilaq, aviisip Sermitsiap aaqqissuisuunera Poul Krarup tallimanngormat Ritzau-mut oqarpoq.
47-nik ukiullip Kim Kielsenip, qanittukkut Naalakkersuisut ajalusoormata Naalakkersuisuni siulittaasuugallartutut toqqarneqartup, sulisartutut inuunini imaani aallartippaa 1993-ilu tikillugu ingerlatsivimmi KNI-mi umiartortutut sulilluni.
Tamatuma kingorna angunni assigalugu politiinngorpoq, 2003-lu angullugu politiitut sulilluni.
Taamanikkut politiinit sulinngiffeqarallarnissaminik qinnuteqarpoq meeqqanut inuusuttunullu ajornartorsiutilinnut suliniummik aallartitsiniarluni, 2005-imilu siullermeersumik Siumut tunuliaqutaralugu Inatsisartunut qinigaavoq.
Inatsisartunut ilaasortaanermini marloriarluni Naalakkersuisunut ilaasortaasarsimavoq, siullermik 2007-miit 2009-mut ineqarnermut, attatveqarnermut aatsitassanullu Naalakkersuisutut, Naalakkersuisunilu maanna ajalusoortuni avatangiisinut pinngortitamullu Naalakkersuisuusimalluni.
Politiiusimasoq siulimi, Aleqa Hammondip, namminersorlutik oqartussat landskarsianit 100.000 koruunit sinnerlugit namminerminut atugaqarsimanermi kingorna tunuartariaqartup, kingorna saliissaaq.
Tamanna peqatigalugu Naalakkersuisut ajalusoorput, taamaattumillu novembarip 28-anni Inatsisartunut qinersisoqassaaq.