Upernavimmioq:
Ilisarisimaneqanngeriarluni TV-imi tusaamasanngortoq
Steven Sørensen isiginnaartitsisartut tusaamasat soorlu Trine Dyrholm, Pernilla August, Carsten Bjørnlund aamma Kirsten Lehfeldt kiisalu isiginnaartitsisartunngorniaq Vivi Sørensen, DR-ip isiginnaagassiaani nangeqattaartumi 'Arvingerne' isiginnaartitseqatigai
Ilinniarnertuunngorniarfimmi ilinniartoq Upernavimmeersoq, ippassaq unnukkut pissangalluni isiginnaartitsisartut tusaamasat arlallit peqatigalugit Arvingernemi nangeqattaartut pingajussaanni DR-imi imminut isiginnaarpoq.
- Imminut takoriasaarluni pissanganarpoq, 20-nik ukiulik Steven Sørensen Upernavimmeersoq oqarpoq, kisianni taanna maanna Røndemi Danmarkimi ilinniarnertuunngorniarfimmi ilinniarpoq.
Facebookimi nalaatsornikkut
TV-imi isiginnaagassiami nangeqattaartumi inuttaaffik Malik piumaneqarluartoq, inuusuttumik Hannahmik aappaqartoq, Steven Sørensenip nalaatsornerinnakkut pissarsiaraa.
Arvingerne III-mi immikkoortoq siulleq takuuk
- Qallunaatoornitta nalaani Facebookimi DR-ip allagartaliussaa takuara. Ikinngutiga misilitsinnissamut nalunaarpoq, kisianni ilagaara, namminerlu filmiliortinnissannut kajumissaarneqarpunga, Steven Sørensen Sermitsiaq.AG-mut oqaluttuarpoq.
Steven Sørensenillu filmiliuutip saavani torrallaangaarami, nangeqattaartuliami isiginnaartitsisunngoriasaarpoq. Tassa isiginnaagassiami misilittagaqanngitsut ikitsunnguit akornanniilluni.
Atuaruk: Vivi Sørensen Odensemi isiginnaartitsisoq
- Misilittagaqannginnera ajornartorsiutaasimanngilaq, kikkut tamarmik imminnut ikioqatigiilluarput, naak aamma isiginnaartitsisartut misilittagartuut ilaagaluartut allaanerusumik pineqarneq ajorpugut, taanna oqarpoq.
Kalaallit pillugit isummiussereertarnerit
Sapaatiummat immikkoortumi aallakaatitami isummiutereertakkat ataatsimullu nunasiaateqarnermut tunngassuteqartut sammineqarput. Steven Sørensenip tamakku ilisarisinnaalluarpai.
- Uanga nammineerlunga misiginikuunngilara, kisianni kalaallit aalakoortartut nalunngilakka, tassungalu attuumassuteqanngitsut aamma eqqorneqartarput, taanna oqarpoq.
Atuaruk: Vivip unnuk isiginnaartitsiffia kingulleq
Vivi Sørensen aamma Nuummeersoq sapaammi aallakaatitami inuusuttutut eqqumiitsuliortutut pikisitsisut ilaattut isiginnaartitseqataavoq. Taanna isiginnaartitsisartutut ilinniarsimasunngungajalerpoq.
- Filmiliornermut tiguartittorujussuuvunga, taamaammat tamatumunnga ilisimasaqarluartumik ikinnguteqarluni nuannerpoq. Assersuutigalugu isiginnaartitsinermut ilinniarfimmi qanoq ilinnialersinnaanersunga Vivip siunnersorpaanga, Steven Sørensen oqaluttuarpoq, taanna Arvingernemi iluatsitsinermi kingorna isiginnaartitsisartunngorusulluni aalajangersimavoq.
Nuummi immiunneqartoq
Sapaatiuppat immikkoortut tullia takutinneqalerpat, Nuummi immiussanik takutitsisoqassaaq. Steven Sørensenip sumiiffinni allani aamma immiussisoqarsimanersoq maanna oqaatigisinnaanngilaa. Kisianni piffissami aggersumi sapaatini takusarnissaa qilanaarineqarsinnaavoq.