qinersineq
Ilinnirtitaaneq pingaarnersaavoq: Meeqqat atuarfiannut atugassarisat amerlanerusut
Nuummi GU-mi arfininngormat qinersisartunik ataatsimiititsinermi IA-p siulittaasuata Sara Olsvigip erseqqissarpaa iliniartitaaneq pingaarnerpaajusoq
Qinersinissaq ima qanitsigilerpoq partiit ilinniagaqartitsinermi politikkimi anguniakkaminnik ersarissumik saqqummiussisariaqarlutik, taamatut isumaqarpoq Inuit Ataqatigiit siulittaasuat Sara Olsvig.
– Suna naapiffigisinnaavarput, arfininngormat Nuummi GU-mi qinersisartunik ataatsimiititsinermi Sara Olsvig aperivoq.
Qinersisartt amerlanerpaamik 50-it politikerinik naalaariarsimapput. Takkuttut amerlanerpaat politikeriupput, oqallinnermilu sinnersaraallutik panel-imiittarput. Eqqoriarneqaannarsinnaavoq qinersisartut nangitseqattaarnerit qatsussimaneraat imaluunniit silageqimmat aneerusunnerusimanersut. Nuummimi GU-p inersua affaannarmik ulikkaarpoq.
IA isumaqarpoq ilinniagaqartitsineq qitiusumik aaqqiissutaasoq, suliffissaaleqisunut ´ataatsimoorluni kivitsinissaq´ eqqarsaatigalugu, Sara Olsvig oqarpoq.
– Politikkimi apeqqutit assigiinngitsut pillugit kikkut suleqatigisinnaavagut?
Demokraatit erseqqissaraat anguniagaasariaqartoq Kalaallit Nunaanni oqaatsit pingasut atorneqalernissaat, Partii Inuit isumaqarpoq Kalaallit Nunaat ukioq 2021-mi namminersulivittariaqartoq.
Meeqqat atuarfiat sammillugu
Siumumeersoq Mette Rasmussen Larsen isumaqarpoq meeqqat atuarfiini 86-ini ilinniutinut atuisoqartariaqartoq.
– Meeqqat atuarfiannit atuakkat pitsaanerusariaqarput. Meerartavut atuakkanik, kulturiminni paassinnaasaannik neqeroorfigisariaqarpavut, Siumut sinnerlugu Inatsisartunut qinigassanngortittoq tikkuaavoq.
– Inuusuttut ilinniagaqartissagutsigit ilinniutinut atortunullu aingaasat amerlanerujussuit atortariaqarpavut, Mette Rasmussen Larsen isumaqarpoq, taannalu meeqqat atuarfianni ilinniartitsisutut ilinniagaqarsimavoq, ullumikkullu Ilinniusiorfimmi aaqqissuisuulluni.
Partii Naleraq isumaqarpoq atugassarisat ilinniartitsisunut atorneqassasut.
– Meeqqat atuarfianni ilinniartitsisut ilinniarteqqittarnerat sammineqarnerusariaqarpoq, Per Rosing Partii Naleqqameersoq oqarpoq.
Sermitsiaq.AG Nuummi GU-mi qinersisartunik ataatsimiititsinermit assinik amerlanerusunik kingusinnerusukkut ilanngussissaaq.
Assit ataani takukkit