Ilinniartut: Unioqqutitsilluni kollegianit anisitsisoqartarpoq

Inatsisit avaqqullugit ilinniartut kollegiani najugaqartut anisinneqartartut Ilinniartut kattuffiat ILI ILI isumaqarpoq. Ilinniartitaanermut allaffeqarfimmut allakkanik ammasunik taama oqariartuuteqarput.

Naapertuutinngilaq
Proffessionsbachelorinngorniat soorlu ilinniartitsisunngorniat eqqungaasartut ILI ILI-mit taakkartorneqarpoq. Ilinniarnermusiaarukaangamimmi kollegianit anisitaasariaqartarmata naak suli ilinniakkaminnik ingerlassingaluarlutik.
- ILI ILI-mi isumaqarpugut peqqutaatinneqartoq tamanna inatsisinik atuuttunik toqqammaveqanngitsoq. Piumasaraarput ilinniartunut malinnaalluarnissamut piumasaatinik naammassinnikkaluarlutik ilinniarnersiutaarussimanerat tunngavilersuutigalugu aneqqusisimaneq ingerlaannartumik utertinneqassasoq, siulersuisuni ilaasortaq Marianne Jensen allappoq.

Ernereerluni atuanngiffeqartut anisitaasarput
Ernereernerup kinguneranik atuanngiffeqartut aamma anisinneqartarput. Tamannali inatsisinik unioqqutitsinerunngilaq, inatsimmi imatut nipeqarmat ”.. atuanngiffeqarallarnikkut, aamma erninermut atatillugu atuanngiffeqarnikkut unitsitsigallarneq, ilinniakkamik unititsinertut isigineqarluni, taamaalillunilu ilinniartut ineqarfianni najugaqarsinnaatitaaneq aamma pisuni taakkunani taamatissalluni,”
- Tamatuma amerlasuutigut kingunerisarpaa anaananngorlaat iniminnit anisitaajumanatik atuanngikkallarnissaraluartik pinngitsoortarmassuk naalungiarsuutitillu Ilisimatusarfimmut nassarlugit atuariartortariaqartarlutik, atuanngiffeqarallarnerminni illoqarfimmut aggerfimminnut uterallartariaqarlutik ilinniarnertik taamaatinnaartariaqartarluguluunniit.
Inatsit allanngortinneqartariaqartoq ilinniartut kattuffiat isumaqarpoq.
- ILI ILI-mi isumaqarpugut inatsisini equngalluinnartoqartoq, anaananngorlaat pisinnaatitaaffitsik atorlugu atuanngiffeqarallarniarlutik aalajangersimasut inigisaminnit anisussaatitaammata, ILI ILI isumaqarpoq.